ఢిల్లీలో వాయు కాలుష్యం తీవ్రం.. సగటు AQI 400 దాటింది; పంజాబ్‌లో పంట వ్యర్థాల దహనం కొనసాగుతోంది

దేశ రాజధాని ఢిల్లీలో వాయు కాలుష్యం ప్రమాదకర స్థాయికి చేరింది. ఈరోజు ఉదయం నగర సగటు AQI 400 మార్కును తాకింది. బురారీ క్రాసింగ్‌లో అత్యధికంగా 441 AQI నమోదైంది.

వివేక్ విహార్‌లో 437, ఢిల్లీ టెక్నలాజికల్ యూనివర్సిటీలో 434, నార్త్ క్యాంపస్ జహంగీర్‌పురిలో 433 AQI నమోదైంది. నగరంలో మొత్తం 59 ఎయిర్ మానిటరింగ్ స్టేషన్లు ఉన్నాయి. ఇవన్నీ పీక్ లెవెల్ కాలుష్యాన్ని రికార్డ్ చేస్తున్నాయి. అర్ధరాత్రి వేళల్లో కాలుష్యం 1500 నుంచి 1700 పాయింట్ల వరకు నమోదైనట్లు సమాచారం.

పొరుగు రాష్ట్రం పంజాబ్‌లో పంట వ్యర్థాల దహనం కొనసాగుతోంది. నవంబర్ 8 నాటికి రాష్ట్రంలో 4,459 చోట్ల దహనం జరిగినట్లు కేంద్ర వాయు నాణ్యత నిర్వహణ కమిషన్ (CAQM) గుర్తించింది. దాదాపు 3,000 ప్రాంతాల్లో అధికారులు క్షేత్రస్థాయి తనిఖీలు చేశారు. వీటిలో 1,310 చోట్ల దహనం జరిగినట్లు నిర్ధారించారు.

నిబంధనలు ఉల్లంఘించిన 1,228 మందిపై జరిమానా విధించారు. మొత్తం ₹62.55 లక్షలు ఫైన్ వసూలు చేసినట్లు అధికారులు తెలిపారు. మరో 884 ఘటనల్లో FIR నమోదు చేశారు. 107 మంది రైతుల భూమి రికార్డుల్లో రెడ్ ఎంట్రీలు చేశారు. విధుల్లో నిర్లక్ష్యం చూపిన 18 మంది నోడల్ అధికారులపై విచారణ జరుగుతోంది.

పంజాబ్‌లో 32.87 లక్షల హెక్టార్లలో వరి సాగు జరిగింది. ఇప్పటివరకు 91.40 శాతం కోత పూర్తయింది. పంట వ్యర్థాలను తగలబెట్టొద్దని సుప్రీం కోర్టు గతంలో ఆదేశాలు జారీ చేసింది. అయినా దహన ఘటనలు కొనసాగుతుండడంతో CAQM చర్యలు తీసుకుంటోంది.

కాలుష్య నిర్వహణపై ఢిల్లీ ప్రభుత్వంపై ఆప్ నేతలు ఆరోపణలు చేశారు. కాలుష్యాన్ని కొలిచే కేంద్రాలను మూసివేసి, పచ్చదనం ఎక్కువ ఉన్న మారుమూల ప్రాంతాల్లో కొత్త కేంద్రాలు ఏర్పాటు చేశారని ఆరోపించారు. పర్యవేక్షణ కేంద్రాల వద్ద నీళ్లు చల్లి AQI విలువలను మారుస్తున్నారని విమర్శించారు. ఈ ఆరోపణలపై ప్రభుత్వం వైపు నుంచి స్పందన తెలియాల్సి ఉంది.

కాలుష్య ప్రభావంతో ఢిల్లీలో 1 నుంచి 5వ తరగతి విద్యార్థులకు ఆన్‌లైన్ పాఠాలు నిర్వహిస్తున్నట్లు సమాచారం. మిగిలిన విద్యార్థులు పాఠశాలలకు వెళ్లడం లేదని తెలుస్తోంది. చలికాలం ప్రారంభమవడంతో గాలి కాలుష్యం మరింత పెరిగే అవకాశం ఉంది.