ఢిల్లీ కోర్టులో విడాకుల కేసు విచారణకు వచ్చిన దంపతులు తిరిగి ఏకం; వీడియో వైరల్

ఢిల్లీకి చెందిన శిఖా సింగ్, సౌరభ్ అనే జంట విడాకుల కోసం కోర్టుకు హాజరై, అక్కడ ఏకమైన ఘటన సోషల్ మీడియాలో వైరల్ అయ్యింది.

2020లో వీరి వివాహం జరిగింది. పెళ్లయిన కొద్ది రోజులకే విభేదాలు మొదలై, శిఖా తన భర్తపై వరకట్న వేధింపుల కేసు పెట్టింది. ఈ కేసు ఖర్చులతో శిఖా కుటుంబం ఆర్థిక ఇబ్బందుల్లో పడింది. ఒత్తిడి కారణంగా శిఖా తండ్రికి గుండెపోటు వచ్చి ప్రభుత్వ ఆసుపత్రిలో చేర్చారు.

ఈ విషయం తెలుసుకున్న సౌరభ్ వెంటనే ఆసుపత్రికి వచ్చి, మామను ప్రైవేటు ఆసుపత్రికి తరలించి సొంత ఖర్చుతో చికిత్స చేయించాడు. ఈ సాయంతో వారి మధ్య ఉన్న వైరం తగ్గి, విడాకుల కేసు విచారణ సందర్భంగా ఇద్దరు కోర్టు ప్రాంగణంలో ఆలింగనం చేసుకుని, మళ్లీ కలిసి జీవించాలని నిర్ణయించుకున్నారు. ఈ దృశ్యం వీడియోలో రికార్డ్ కాగా, సోషల్ మీడియాలో వైరల్ అయ్యింది.