ఢిల్లీ, హర్యానాలో భారీ వర్షాలు: జనజీవనం స్తంభం, రెడ్ అలర్ట్

ఢిల్లీ, హర్యానాలో గత రెండు రోజులుగా భారీ వర్షాలు కురుస్తున్నాయి. ఈ వర్షాల కారణంగా అనేక ప్రాంతాలు జలదిగ్బంధంలో చిక్కుకున్నాయి.

గురుగ్రామ్‌తో పాటు పలు నగరాల్లో రోడ్లన్నీ కాల్వలను తలపించాయి. ట్రాఫిక్ జామ్ ఏర్పడి జనజీవనం స్తంభించింది. ఢిల్లీలోని మెహరౌలి, బదర్పూర్ రోడ్డు, ఐటీఓ, వజీరాబాద్, పటేల్ రోడ్, రోహతక్ రోడ్, కీర్తినగర్, ఢిల్లీ-జైపూర్ హైవే వంటి ప్రాంతాల్లో భారీ ట్రాఫిక్ జామ్ ఏర్పడింది.

ముంపు ప్రాంతాల్లో ఎన్డీఆర్ఎఫ్, స్థానిక అధికారులు సహాయక చర్యలు చేపట్టారు. లోతట్టు ప్రాంతాల్లో చిక్కుకున్న ప్రజలను సురక్షిత ప్రాంతాలకు తరలిస్తున్నారు. ఢిల్లీలోని జగత్పూర్ ప్రాంతంలో డ్రైనేజీ మూత తెరిచి ఉండడంతో ముగ్గురు విద్యార్థులు అందులో పడిపోయారు. స్థానికులు వారిని రక్షించారు.

వాతావరణ శాఖ (IMD) ఢిల్లీ, హర్యానాకు మరో 24 గంటల పాటు భారీ నుంచి అతి భారీ వర్షాల అవకాశం ఉన్నందున రెడ్ అలర్ట్ జారీ చేసింది. ప్రజలు అప్రమత్తంగా ఉండాలని, అత్యవసరమైతేనే ఇళ్ల నుంచి బయటకు రావాలని అధికారులు సూచించారు.