ఢిల్లీలో భారీ వర్షం, IMD ఆరెంజ్ అలర్ట్; రోడ్లు జలమయం

ఢిల్లీలో భారీ వర్షం కురుస్తోంది. లోతట్టు ప్రాంతాలు జలమయమయ్యాయి. రోడ్లపై నీరు చేరడంతో వాహనదారులు తీవ్ర ఇబ్బందులు ఎదుర్కొంటున్నారు.

ఐఎండి (IMD) ఢిల్లీకి ఆరెంజ్ అలర్ట్ జారీ చేసింది. రాబోయే 24 గంటల పాటు భారీ నుంచి అతి భారీ వర్షాలు కురిసే అవకాశం ఉందని వాతావరణ శాఖ హెచ్చరించింది.

ఢిల్లీ ముఖ్యమంత్రి రేఖా గుప్తా పరిస్థితిని ఎప్పటికప్పుడు సమీక్షిస్తున్నారు. లోతట్టు ప్రాంతాల ప్రజలు అప్రమత్తంగా ఉండాలని ప్రభుత్వం హెచ్చరించింది. మునిర్కా, మహిపాల్‌పూర్, ఛతర్పూర్, ద్వారక, ఐటీఓ, ఔటర్ రింగ్ రోడ్ తదితర ప్రాంతాల్లో నీరు నిలిచింది. దీంతో ట్రాఫిక్ జామ్‌లు ఏర్పడి ప్రయాణికులు గంటలు ఆలస్యంగా గమ్యస్థానాలకు చేరుతున్నారు.

యమునా నది ప్రవాహం సాధారణ స్థాయిలో ఉన్నందున నదీ పరీవాహక ప్రాంతాలకు ముప్పు లేదని అధికారులు తెలిపారు. అయితే నీటి నిల్వలు ఎక్కువగా ఉన్న లోతట్టు ప్రాంతాల నుంచి నీటిని తోడే ప్రయత్నాలు కొనసాగుతున్నాయి. హర్యానా, పంజాబ్, ఉత్తరాఖండ్ రాష్ట్రాల్లోనూ భారీ వర్షాలు కురుస్తున్నాయి. ఉత్తరాఖండ్‌లో కొండచరియలు విరిగిపడుతున్న నేపథ్యంలో మరింత అప్రమత్తంగా ఉండాలని హెచ్చరికలు జారీ చేశారు.