ఢిల్లీ హై అలర్ట్: పార్లమెంట్ సెషన్ ముందు భద్రత కట్టుదిట్టం, సీజేపీ ర్యాలీ

ఢిల్లీలో హై అలర్ట్ ప్రకటించారు. పార్లమెంట్ వర్షాకాల సమావేశాలు సోమవారం ప్రారంభం కానున్న నేపథ్యంలో సీజేపీ (CJP) సంస్థ ‘చలో సంసద్’ ర్యాలీకి పిలుపునిచ్చింది. కేంద్ర విద్యా మంత్రి ధర్మేంద్ర ప్రధాన్ రాజీనామా డిమాండ్ చేస్తూ ఈ ర్యాలీ నిర్వహిస్తున్నారు.

భద్రత చర్యల్లో భాగంగా ఢిల్లీ పోలీసులు 5,000 మందికిపైగా సిబ్బందిని, 25 పైగా పారామిలిటరీ బెటాలియన్లను మోహరించారు. నగరాన్ని 15 భద్రతా జోన్లుగా విభజించి సీనియర్ పోలీస్ అధికారులను నియమించారు. విజయ్ చౌక్, పార్లమెంట్ స్ట్రీట్, ప్రధాని నివాసం, ఇండియా గేట్ ప్రాంతాల్లో నిఘా పెంచారు.

పోలీసులు నిషేధాజ్ఞలు విధించి, అనుమతి లేకుండా ఐదుగురు లేదా అంతకంటే ఎక్కువ మంది గుమికూడడానికి అనుమతి లేదని తెలిపారు. వాటర్ క్యానన్లు, యాంటీ రైట్ వాహనాలు, రాపిడ్ రెస్పాన్స్ టీమ్లను సిద్ధంగా ఉంచారు.

సీజేపీ చీఫ్ అభిజిత్ దీప్కే మాట్లాడుతూ, దేశం నలుమూలల నుంచి ప్రజలు ఢిల్లీకి చేరుకుంటున్నారని, పోలీసుల అడ్డంకులు ర్యాలీని ఆపలేవని చెప్పారు. నిరసన శాంతియుతంగా ఉంటుందని, తమ డిమాండ్లను ప్రభుత్వ దృష్టికి తీసుకెళ్లడమే లక్ష్యమని ఆయన వివరించారు.