ఢిల్లీ మాళవీయ నగర్ అగ్నిప్రమాదం: 37 మందిని రక్షించినట్లు ఫైర్ ఆఫీసర్ వెల్లడి

ఢిల్లీలోని మాళవీయ నగర్‌లో చెలరేగిన భారీ అగ్నిప్రమాదంలో 37 మందిని సురక్షితంగా బయటకు తీసుకువచ్చినట్లు ఢిల్లీ ఫైర్ సర్వీస్ అధికారి తెలిపారు. ఈ ప్రమాదం గురించి తొలి కాల్ రాత్రి 8:50 గంటలకు అందగా, ఒక్క నిమిషంలోనే ఏడు ఫైర్ ఇంజన్లను ఘటనా స్థలానికి పంపించామని ఆయన వివరించారు. కాల్స్ ఎక్కువ కావడంతో అదనపు వాహనాలను కూడా రంగంలోకి దింపాల్సి వచ్చింది. ఆరు అంతస్తుల ఈ భవనంలో బేస్‌మెంట్ నుంచి పై అంతస్తు వరకు మంటలు వ్యాపించాయి. అయితే సంఘటనా స్థలానికి చేరుకున్న వెంటనే మంటలను అదుపు చేయగలిగామని, కానీ పెద్ద సంఖ్యలో లోపల చిక్కుకున్న వారిని రక్షించడానికి సమయం పట్టిందని ఆ అధికారి తెలిపారు. ఎదురుగా ఉన్న మ్యాక్స్ హాస్పిటల్‌లో చికిత్స పొందుతున్న రోగుల బంధువులు, విదేశీయులతో సహా చాలా మంది ఈ భవనంలో పేయింగ్ గెస్ట్‌లుగా ఉంటున్నట్లు స్థానికుల ద్వారా తెలిసిందని ఆయన చెప్పారు. క్షతగాత్రుల పరిస్థితిపై ఆసుపత్రి నుంచి సమాచారం కోసం ఎదురుచూస్తున్నామని ఆయన పేర్కొన్నారు. భవనాన్ని పూర్తిగా సెర్చ్ చేసి పోలీసులకు అప్పగించామని, దర్యాప్తు ప్రారంభమైందని ఫైర్ అధికారి వెల్లడించారు.