ఢిల్లీ NCRలో భారీ వర్షం.. చత్తర్పూర్లో 5 అడుగుల నీరు, గురుగ్రామ్ ఆసుపత్రి జలమయం

Delhi NCR లో గురువారం (ఆగస్టు 7) తెల్లవారుజామున భారీ వర్షం కురిసింది. దీంతో రాజధాని రోడ్లు జలమయమై ట్రాఫిక్ స్తంభించింది. దక్షిణ ఢిల్లీలోని ఛత్తర్పూర్ వాల్మీకి బస్తీలో 4 నుంచి 5 అడుగుల వరకు నీరు నిలిచింది. MB రోడ్డుపై ఓఖ్లా మోడ్ నుంచి ఖాన్పూర్ అంబేద్కర్ నగర్ మధ్య 4 కిలోమీటర్ల పాటు నీటితో వాహనాలు కదలలేకపోయాయి. బురారీ, 100 ఫీట్ల రోడ్డు, గాంధీ నగర్ ప్రాంతాల్లో రోడ్లు చెరువుల్లా మారాయి. ఈ వర్షం కారణంగా 9 ఇళ్ల కూలి, 16 చెట్లు నేలకొరిగాయి. సుప్రీంకోర్టు సమీపంలో భారీ వృక్షం కూలినా ఎలాంటి ప్రాణనష్టం జరగలేదు. ఛత్తర్పూర్లో పాఠశాల పిల్లలను తాత్కాలిక పడవలపై ఇంటికి చేర్చాల్సి వచ్చింది. దిల్లీ పోలీస్ నార్కోటిక్స్ కార్యాలయం నీట మునిగింది. గురుగ్రామ్లో పరిస్థితి మరింత ఘోరంగా ఉంది. శీతలా మాతా మందిరం చుట్టూ 3-4 అడుగుల నీరు చేరి భక్తులు తీవ్ర ఇబ్బందులు ఎదుర్కొన్నారు. సివిల్ ఆసుపత్రి బేస్మెంట్ నీట మునిగి వైద్య సేవలకు అంతరాయం ఏర్పడింది. మహామాయా ఫ్లైఓవర్ సమీపంలో ఆంబులెన్స్ 30 నిమిషాలు నీటిలో చిక్కుకుంది. వర్షం గంటల తరబడి కురవగా, రోడ్లు అడ్డుపడి లక్షల మంది ప్రయాణికులు నానా అవస్థలు పడ్డారు. ఐఎండీ హెచ్చరిక ప్రకారం, రాబోయే రోజుల్లో మరింత వర్షం కురిసే అవకాశం ఉంది. దీంతో రాజధాని ప్రాంతం మళ్లీ జలదిగ్బంధంలో చిక్కుకునే ప్రమాదం నెలకొని ఉంది. ప్రతి ఏడాది వర్షం వచ్చినా ఇదే పరిస్థితి నెలకొంటుండటంతో నగర మౌలిక సదుపాయాలపై మళ్లీ ప్రశ్నలు తలెత్తాయి.