సైబర్ నేరాల వల్ల ప్రజలు రూ.1,700 కోట్లు నష్టపోయారు: డీజీపీ సీవీ ఆనంద్

తెలంగాణలో సైబర్ నేరాల వల్ల ప్రజలు భారీగా నష్టపోతున్నారని డీజీపీ సీవీ ఆనంద్ తెలిపారు. గత మూడేళ్లలో సైబర్ మోసాల ద్వారా రాష్ట్ర ప్రజలు సుమారు రూ.1,700 కోట్లు కోల్పోయారని ఆయన వెల్లడించారు. అదే సమయంలో దొంగతనాలు, దోపిడీల వంటి సాధారణ నేరాల వల్ల కేవలం రూ.250 కోట్ల నష్టం జరిగిందని పేర్కొన్నారు.

ప్రధాని మోడీ నిర్వహించిన సైబర్ నేరాల సమీక్షా వీడియో కాన్ఫరెన్స్‌లో 29 రాష్ట్రాలు, కేంద్రపాలిత ప్రాంతాలతో పోలిస్తే తెలంగాణ ప్రథమ స్థానంలో నిలిచిందని డీజీపీ తెలిపారు. 'రూ.10 పెట్టుబడికి రూ.20 లాభం' వంటి ఆన్లైన్ మోసాల పట్ల ప్రజలు అప్రమత్తంగా ఉండాలని సూచించారు.

సైబర్ నేరగాళ్లు చిన్న మొత్తంలో ఎక్కువ రాబడి చూపించడం ద్వారా మోసాలకు పాల్పడుతున్నారని, అవగాహనతోనే వీటిని నియంత్రించవచ్చని ఆయన వివరించారు. బాధితుల సొమ్ము రికవరీ కోసం ప్రయత్నిస్తున్నామని, కానీ మోసాలకు పూర్తి అడ్డుకట్ట వేయడం సవాల్ అని అన్నారు. సైబర్ విభాగాన్ని బలోపేతం చేయడంతో పాటు అవగాహన సదస్సులు నిర్వహిస్తున్నట్లు చెప్పారు.