ధరణి పోర్టల్‌లో 10 వేల ఎకరాల భూముల యాజమాన్య హక్కులు చట్టవిరుద్ధంగా మార్పు

తెలంగాణలోని ధరణి పోర్టల్‌ ద్వారా సాగుభూములు, ప్రభుత్వ మిగులు భూములు, భూదాన్ భూములు సహా 10 వేల ఎకరాలకు పైగా భూముల యాజమాన్య హక్కులు చట్టవిరుద్ధంగా మార్చినట్లు రాష్ట్ర ప్రభుత్వ విచారణలో వెలుగులోకి వచ్చింది. సాంకేతిక లోపాలను అడ్డుపెట్టుకుని ఈ అక్రమాలు జరిగాయని దర్యాప్తు బృందం గుర్తించింది.

ఈ మార్పులు రంగారెడ్డి, మేడ్చల్, సిద్దిపేట, రాజన్న సిరిసిల్ల, జయశంకర్ భూపాలపల్లి జిల్లాలతో పాటు వికారాబాద్, మహబూబ్‌నగర్, ఉమ్మడి నల్గొండ జిల్లాల్లోని కొన్ని ప్రాంతాల్లో గుర్తించారు. మేడ్చల్ జిల్లా రావెల్కోల్‌లో 16 ఎకరాలు, 15.28 ఎకరాలు చొప్పున ఇతరుల పేర్లపైకి మారినట్లు లెక్క తేల్చారు.

ఈ అక్రమాల్లో హైదరాబాద్‌లోని భూ పరిపాలన ప్రధాన కమిషనర్ (సీసీఎల్ఏ) కార్యాలయానికి చెందిన ఇద్దరు అధికారులు, వివిధ జిల్లాల రెవెన్యూ సిబ్బంది, కొందరు మాజీ ఉద్యోగులు, ఆన్‌లైన్ సెంటర్ల నిర్వాహకులు, దళారులు ప్రమేయం ఉన్నట్లు దర్యాప్తులో తేలింది. సాధారణ దరఖాస్తులు, దస్తరాలు లేకుండా ప్రత్యేక సాఫ్ట్‌వేర్ సాయంతో హక్కుల మార్పులు చేసినట్లు గుర్తించారు.

కేసును సైబర్‌క్రైమ్, ఐటీ, ఎన్ఐసీ విభాగాలతో కూడిన ఉన్నత స్థాయి బృందం దర్యాప్తు చేస్తోంది. ఇప్పటికే పలువురు అనుమానితులను పోలీసులు అదుపులోకి తీసుకున్నారు. బాధ్యులైన తహసీల్దార్లు, నాయబు తహసీల్దార్లు, ధరణి ఆపరేటర్లకు పలు జిల్లాల కలెక్టర్లు నోటీసులు జారీ చేశారు.