మిర్యాలగూడలో ప్రైవేట్ ఆసుపత్రిపై వైద్యాధికారుల దాడులు; లింగ నిర్ధారణ, అబార్షన్ కేసులో విచారణ

సూర్యాపేట జిల్లా పెన్పహాడ్ మండలానికి చెందిన ఓ మహిళకు ఇప్పటికే ఒక కూతురు ఉండగా, రెండోసారి కూడా ఆడ శిశువుగా లింగ నిర్ధారణ పరీక్షలో తేలింది. దీంతో ఆమెను మిర్యాలగూడలోని ఓ ప్రైవేట్ ఆసుపత్రిలో అబార్షన్ కోసం తీసుకువచ్చినట్లు సమాచారం రావడంతో, నల్గొండ జిల్లా వైద్య, ఆరోగ్యశాఖ అధికారి (డిఎంహెచ్ఓ) రాహుల్ ఆకస్మిక తనిఖీలు నిర్వహించారు.

ఆసుపత్రిలోని వైద్య రికార్డులు, చికిత్స వివరాలను అధికారులు క్షుణ్నంగా పరిశీలించారు. నిబంధనలకు విరుద్ధంగా ఆసుపత్రి యాజమాన్యం వ్యవహరించినట్లు తేలితే చట్టపరమైన చర్యలు తప్పవని డిఎంహెచ్ఓ హెచ్చరించారు.

ఈ కేసులో ఉపయోగించిన స్కానింగ్ సెంటర్లపై కూడా మరుసటి రోజు నుంచి దాడులు చేపట్టనున్నట్లు తెలిపారు. లింగ నిర్ధారణ పరీక్షలకు అడ్డుకట్ట వేసేందుకు ఇలాంటి తనిఖీలు కొనసాగిస్తామని డిఎంహెచ్ఓ చెప్పారు.

అంతకుముందే ఆ మహిళ కుటుంబ సభ్యులకు కౌన్సిలింగ్ ఇచ్చామని, అబార్షన్ చేయించినట్లు తేలితే కఠిన చర్యలు తీసుకుంటామని హెచ్చరించినట్లు డిఎంహెచ్ఓ రాహుల్ వెల్లడించారు.