గుర్తుకొస్తున్నాయి కథ నా ఫ్రెండ్స్ కోసమే రాశాను: డైరెక్టర్ వినోద్

వెబ్ సిరీస్‌ ‘గుర్తుకొస్తున్నాయి’ సక్సెస్ మీట్‌లో డైరెక్టర్ వినోద్ మాట్లాడారు. ఈ కథను తన స్నేహితులకు అంకితం ఇస్తున్నట్టు చెప్పారు. చిన్నప్పటి నుంచి తనకు కుటుంబంతో పాటు స్నేహితుల మద్దతు కూడా ఎంతో ఉందని, అందుకే ఈ కథ రాశానని వినోద్ వివరించారు.

ఈ సిరీస్‌కు స్ఫూర్తి నిర్మాత శరత్ చంద్ర నాయుడు నిర్వహిస్తున్న ‘రేలంగ మామయ్య’ ఫేస్‌బుక్ పేజీ నుంచి వచ్చిందన్నారు. సిరీస్ అవకాశం ఇచ్చిన సాయికి, ఇన్‌పుట్స్ ఇచ్చిన నితిన్, కంటెంట్ హెడ్ భరణ్‌లకు ధన్యవాదాలు తెలిపారు.

ఎడిటర్ శ్రీధర్ చేసిన మార్పులు కథకు బాగా ఉపయోగపడ్డాయని వినోద్ పేర్కొన్నారు. చిన్న పాప నుంచి పెద్ద పాపగా మారే ట్రాన్సిషన్ సూచించింది శ్రీధరేనని, ఆ ఐడియా తనకు బాగా నచ్చిందన్నారు. మ్యూజిక్ డైరెక్టర్లు సుహాస్, అజయ్‌లు అందించిన బాణీలు, ముఖ్యంగా ఫ్రెండ్‌షిప్ సాంగ్, అమ్మమ్మ సాంగ్‌లు ప్రేక్షకులను ఆకట్టుకుంటున్నాయన్నారు.

నటీనటుల ఎంపికలో ప్రతి క్యారెక్టర్‌కు ఆడిషన్స్ చేయించామని, రామచరణ్, మేఘన, స్టీవ్, చిన్న బన్నీ, సైమన్, మహేష్ వాదర్, సునీత తదితరుల నటన బాగుందని వినోద్ చెప్పారు. ఈ సిరీస్ యూట్యూబ్‌లో విడుదలై ప్రేక్షకుల నుండి మంచి స్పందన వస్తోంది.