దీపావళి సీజన్‌లో సైబర్ మోసాలు: ఫేక్ పటాకుల అమ్మకాలు, APK ఫైల్స్‌పై పోలీసుల హెచ్చరిక

దీపావళి పండగ సీజన్‌ను లక్ష్యంగా చేసుకుని సైబర్ నేరగాళ్లు కొత్త రకం మోసాలకు సిద్ధమవుతున్నారని సైబర్ క్రైమ్ పోలీసులు హెచ్చరించారు. ఆన్‌లైన్‌లో పటాకుల కొనుగోలు, గిఫ్ట్ ఆఫర్ల పేరుతో వచ్చే పోస్టులు, లింకులపై ప్రజలు అప్రమత్తంగా ఉండాలని సూచించారు.

డిస్కౌంట్ ఆఫర్ల పేరుతో ఫేక్ వెబ్‌సైట్లు సృష్టించి మోసాలకు యత్నిస్తున్నారు. ప్రధాని పేరుతో ₹8,000 దీపావళి కానుక ఇస్తున్నట్టు ఫేక్ మెసేజ్‌లు, లింకులు పంపుతున్నారు. విలువైన గిఫ్ట్ ఆశ చూపి లింక్‌పై క్లిక్ చేయమని ప్రేరేపిస్తున్నారు. డెలివరీ పేరుతో ఫోన్ చేసి OTP, అకౌంట్ వివరాలు తెలుసుకునే ప్రయత్నం కూడా జరుగుతోంది.

సోషల్ మీడియాలో తెలియని వ్యక్తుల నుంచి చాలా తక్కువ ధరకు పటాకులు, దీపావళి గిఫ్ట్స్ అంటూ APK ఫైల్స్ పంపుతున్నారు. ఆ ఫైల్‌ను డౌన్‌లోడ్ చేసుకోగానే ఫోన్‌లోని మొత్తం డేటా నేరగాళ్ల చేతికి చేరుతుంది. బ్యాంక్ అకౌంట్, క్రెడిట్ కార్డు, డెబిట్ కార్డు వివరాలు కాంప్రమైజ్ అయి డబ్బు పోయే ప్రమాదం ఉంది.

అనుమానాస్పద లింకులు, APK ఫైల్స్‌ను ఎట్టి పరిస్థితుల్లోనూ క్లిక్ చేయకూడదని, డౌన్‌లోడ్ చేయకూడదని పోలీసులు సూచిస్తున్నారు. అలాంటి మెసేజ్‌లు వచ్చిన వెంటనే డిలీట్ చేయాలని చెబుతున్నారు.

మోసం జరిగినా, అనుమానం ఉన్నా సైబర్ క్రైమ్ హెల్ప్‌లైన్ 1930కి కాల్ చేయాలని పోలీసులు తెలిపారు. దగ్గర్లోని పోలీస్ స్టేషన్‌కు వెళితే అక్కడి సిబ్బంది ఫోన్‌ను క్లీన్ చేసి సహాయం చేస్తారని పేర్కొన్నారు.