చౌటుప్పల్ జోగిని హత్య కేసులో ఇద్దరు నిందితుల అరెస్టు

యాదాద్రి భువనగిరి జిల్లా చౌటుప్పల్‌లో జోగిని సుధాకర్ స్వామి (48) హత్య కేసులో పోలీసులు ఇద్దరు నిందితులను అరెస్టు చేశారు. నిర్మల్ జిల్లాలో వాహన తనిఖీ సమయంలో వారు పట్టుబడ్డారు.

అక్టోబర్ 31న చౌటుప్పల్ మునిసిపాలిటీ పరిధిలోని మార్కండేయ నగర్ కాలనీలో ఉన్న సుధాకర్ స్వామి ఇంట్లోకి దుండగులు చొరబడ్డారు. ఆయన కాళ్లు, చేతులు కట్టేసి హత్య చేశారు. అనంతరం ఇంట్లో ఉన్న 130 తులాల బంగారం, 2.5 కిలోల వెండి, ₹9 నుంచి ₹10 లక్షల నగదు తీసుకెళ్లారు. ఆయన కారులోనే పరారయ్యారు.

కారు GPS ఆధారంగా పోలీసులు tracking చేశారు. కారు నిర్మల్ వైపు వెళ్తున్నట్టు గుర్తించి అక్కడి పోలీసులకు సమాచారం ఇచ్చారు. నిర్మల్ రూరల్ SI, లింబద్రి పోలీసులతో కలిసి సోన్ టోల్ ప్లాజాలో వాహన తనిఖీ చేశారు. పోలీసులను చూసి పరారయ్యేందుకు ప్రయత్నించిన నిందితులను వెంటాడి పట్టుకున్నారు.

నిందితులు అస్సాం రాష్ట్రానికి చెందిన పవన్, హర్ష అని పోలీసులు గుర్తించారు. సుమారు రెండేళ్ల క్రితం అస్సాంలోని కామాఖ్య దేవాలయంలో సుధాకర్ స్వామిని పవన్ కలిశారు. అప్పుడు ఇద్దరూ ఫోన్ నంబర్లు ఇచ్చిపుచ్చుకున్నారు. రెండు నెలల క్రితం పవన్ చౌటుప్పల్ వచ్చి ఆయనను కలిశారు.

అక్టోబర్ 21న దోపిడీ ఉద్దేశంతో వచ్చినా అది సాధ్యపడలేదని పోలీసులు తెలిపారు. అక్టోబర్ 31 రాత్రి స్నేహితుడు హర్షతో కలిసి మళ్లీ వచ్చి హత్య, దోపిడీ చేశారని పోలీసులు వివరించారు. నిందితుల నుంచి 1.4 కిలోల బంగారం, 3 కిలోల వెండి, ₹9 లక్షల నగదు స్వాధీనం చేసుకున్నారు.

స్వాధీనం చేసుకున్న ఆస్తిని తదుపరి విచారణ కోసం యాదాద్రి జిల్లా పోలీసులకు అప్పగించారు. చౌటుప్పల్ పోలీసులు కేసు నమోదు చేసి దర్యాప్తు కొనసాగిస్తున్నారు.