డబుల్ ఓటింగ్ చేస్తే ఏడాది జైలు శిక్ష: తెలంగాణ సీఈఓ సుదర్శన్ రెడ్డి హెచ్చరిక

తెలంగాణ రాష్ట్ర ఎన్నికల ప్రధానాధికారి (CEO) సుదర్శన్ రెడ్డి డబుల్ ఓటింగ్ పై కీలక హెచ్చరిక చేశారు. ఒకే వ్యక్తి రెండు ఓట్లు కలిగి ఉండడం నేరమని, దీనిపై ఏడాది జైలు శిక్షతో పాటు జరిమానా విధించబడుతుందని స్పష్టం చేశారు. ఈ జైలు శిక్ష తప్పనిసరి అని, డబుల్ ఓటింగ్ చేస్తే పట్టుబడి జైలుకు వెళ్లాల్సి వస్తుందని హెచ్చరించారు.

వోటు హక్కు లేకపోతే రేషన్ కార్డులు, పించన్లు, ఆరోగ్యశ్రీ వంటి సంక్షేమ పథకాలు నిలిపివేస్తామంటూ ప్రచారం జరుగుతున్న నేపథ్యంలో, ఈ విషయం తమ పరిధిలో లేదని సుదర్శన్ రెడ్డి తెలిపారు. ఇది రాష్ట్ర ప్రభుత్వ నిర్ణయమని, ఆ వివరాలు తమకు లేవని స్పష్టం చేశారు.

వోటర్ జాబితాలో పేరు లేనివారు ఆగస్టు, సెప్టెంబర్ నెలల్లో ఫామ్-6 నింపి దరఖాస్తు చేసుకోవచ్చని సూచించారు. ఇతర ప్రాంతాల నుంచి వచ్చి పట్టణాల్లో నివసిస్తున్నవారికి, 2002 నాటి వివరాలు లేనివారికి నోటీసు వెళ్తుందని, అన్ని వివరాలు పూర్తిగా నింపాలని చెప్పారు. బీఎల్ఓలు ఇళ్లకు వెళ్లి 10 నిమిషాల సమయం తీసుకుని ఫామ్ నింపించాలని సూచించారు.