డాక్టర్ గురు ఎన్ రెడ్డికి జీ తెలుగు న్యూస్ లైఫ్ టైం అచీవ్మెంట్ అవార్డు

హైదరాబాద్‌లోని కాంటినెంటల్ హాస్పిటల్స్ వ్యవస్థాపకులు, చైర్మన్ డాక్టర్ గురు ఎన్ రెడ్డికి జీ తెలుగు న్యూస్ లైఫ్ టైం అచీవ్మెంట్ అవార్డు లభించింది. ఆరోగ్య సేవా రంగంలో ఆయన చేసిన విశేష సేవలకు గాను ఈ పురస్కారం ప్రదానం చేశారు.

డాక్టర్ గురు ఎన్ రెడ్డి ఒక గ్యాస్ట్రోఎంటరాలజిస్ట్. ఉస్మానియా యూనివర్సిటీలో గోల్డ్ మెడల్స్ సాధించారు. 40 ఏళ్లకు పైగా క్లినికల్ అనుభవం ఉన్న ఆయన, 3 లక్షలకు పైగా ఎండోస్కోపీలు నిర్వహించారు. 3 లక్షలకు పైగా రోగులకు చికిత్స అందించారు.

అమెరికాలోని హ్యూస్టన్‌లో 10 సార్లు ఉత్తమ డాక్టర్‌గా ఎంపికయ్యారు. 2017-18లో తెలంగాణ ప్రభుత్వం ఆయనను పద్మశ్రీ పురస్కారానికి నామినేట్ చేసింది. టైమ్స్ ఆఫ్ ఇండియా నుండి గ్యాస్ట్రోఎంటరాలజీ, జిఐ సర్జరీ విభాగంలో లెజెండ్ ఆఫ్ ది ఇయర్ అవార్డు కూడా అందుకున్నారు.

అవార్డు స్వీకరిస్తూ డాక్టర్ గురు ఎన్ రెడ్డి మాట్లాడారు. "ఈ అవార్డు అందరి డాక్టర్లకు, మా కాంటినెంటల్ బృందానికి, నర్సులకు, సిబ్బందికి అంకితం చేస్తున్నాను" అని తెలిపారు. లైఫ్ టైం అచీవ్మెంట్ అవార్డు వల్ల తన జీవితం ముగిసిపోతోందా అనే భయం కలుగుతుందని, కానీ ఇది మరింత ముందుకు వెళ్లేందుకు ప్రేరణగా ఉంటుందని చెప్పారు.

ఆర్టిఫిషియల్ ఇంటెలిజెన్స్ వైద్య రంగంలో మార్పులు తీసుకొస్తున్నప్పటికీ, డాక్టర్-పేషెంట్ సంబంధానికి ప్రత్యామ్నాయం లేదని ఆయన అభిప్రాయపడ్డారు. "ఒక పేషెంట్ బాధను అర్థం చేసుకుని, చేయి పట్టుకొని సహానుభూతి తెలిపే విషయంలో డాక్టర్‌ను మించినది ఏదీ లేదు" అని వ్యాఖ్యానించారు.