కిడ్నీ ఫెయిల్యూర్ నివారణపై సీనియర్ నెఫ్రాలజిస్ట్ డాక్టర్ పీఎస్ వలీ సూచనలు

యశోదా హాస్పిటల్, సికింద్రాబాద్ సీనియర్ నెఫ్రాలజిస్ట్, ట్రాన్స్ప్లాంట్ ఫిజీషియన్ డాక్టర్ పీఎస్ వలీ కిడ్నీ ఫెయిల్యూర్ కారణాలు, లక్షణాలు, నివారణపై వివరించారు.

ఆయన మాట్లాడుతూ, ప్రతి కిడ్నీలో దాదాపు 10 లక్షల నెఫ్రాన్లు ఉంటాయని, రెండు కిడ్నీలు కలిపి 90% పనితీరు తగ్గినప్పుడే కిడ్నీ ఫెయిల్యూర్ గా పరిగణిస్తామని చెప్పారు. కిడ్నీలు రక్తాన్ని శుద్ధి చేయడంతో పాటు, హిమోగ్లోబిన్ ఉత్పత్తి, విటమిన్ డీ మెటబాలిజం వంటి బహుళ విధులు నిర్వహిస్తాయని వివరించారు.

కిడ్నీ వ్యాధులకు ప్రధాన కారణాలు: దీర్ఘకాలంగా అదుపులేని మధుమేహం, అధిక రక్తపోటు. వైద్య పర్యవేక్షణ లేకుండా ఎక్కువ కాలం పెయిన్ కిల్లర్లు వాడటం, తరచుగా కిడ్నీ స్టోన్స్ రావడం, ఆటో ఇమ్యూన్ డిజార్డర్లు, కుటుంబ చరిత్ర కూడా ప్రమాద కారకాలని డాక్టర్ వలీ తెలిపారు.

లక్షణాల విషయంలో, 90% మందిలో కిడ్నీ పాడైనా మొదట్లో ఎలాంటి లక్షణాలు కనిపించవని హెచ్చరించారు. కాళ్ల వాపులు, ఉదయం పూట కళ్ల చుట్టూ పొంగు, 45 ఏళ్ల లోపు రక్తపోటు రావడం, రాత్రి పడుకున్నప్పుడు శ్వాస తీసుకోవడం కష్టం, మూత్రం రంగు కోలా లేదా కాఫీ రంగులోకి మారడం, రాత్రిపూట మూత్ర విసర్జనకు ఎక్కువసార్లు లేవడం వంటివి కిడ్నీ సమస్యలను సూచిస్తాయన్నారు.

కిడ్నీ ఆరోగ్యాన్ని గుర్తించడానికి కంప్లీట్ యూరిన్ ఎగ్జామినేషన్, సీరం క్రియాటినిన్/జీఎఫ్ఆర్, యూరిన్ ఆల్బిన్ క్రియాటిన్ రేషియో (యూఏసీఆర్) టెస్ట్లు చేయించుకోవాలని సూచించారు. యూఏసీఆర్ టెస్టుతో కిడ్నీ జబ్బును రక్తంలో క్రియాటినిన్ పెరగడానికి 6 సంవత్సరాల ముందే గుర్తించవచ్చని, దీని సాధారణ విలువ 30 కంటే తక్కువ ఉండాలని వివరించారు.

నీళ్లు, ఉప్పు వాడకంపై స్పష్టత ఇస్తూ, ఆఫీసుకు వెళ్లే వ్యక్తులు రోజుకు 2.5 నుండి 3 లీటర్లు తాగితే సరిపోతుందని, ఎక్కువ నీళ్లు తాగడం వల్ల కిడ్నీలు డిటాక్స్ అవుతాయనేది అపోహ అని డాక్టర్ వలీ చెప్పారు. ఉప్పు రోజుకు 5 గ్రాములు (ఒక టీ స్పూన్) మించకూడదని, ప్రాసెస్డ్, జంక్ ఫుడ్ లో దాగి ఉన్న ఉప్పు వల్ల ఈ పరిమితి దాటిపోతుందని హెచ్చరించారు.

చివరగా డయాబెటిక్ రోగులకు హెచ్‌బిఏ1సి 7 కంటే తక్కువ, అధిక రక్తపోటు ఉన్నవారికి బీపీ 130/80 mmHg కంటే తక్కువ ఉండేలా చూసుకోవాలని, వారానికి 150 నిమిషాల వ్యాయామం, సమతుల ఆహారం తీసుకోవాలని సూచించారు. వైద్య సలహా లేకుండా పెయిన్ కిల్లర్లు, హెర్బల్ డిటాక్స్ డ్రింక్స్ వాడరాదని హెచ్చరించారు.