పంట అవశేషాలు తగలబెట్టడం నేల ఆరోగ్యానికి, పర్యావరణానికి తీవ్ర నష్టం చేకూరుస్తోంది : నిపుణుల హెచ్చరిక

పంట అవశేషాలు తగలబెట్టడం వల్ల నేల ఆరోగ్యం, పర్యావరణం తీవ్రంగా దెబ్బతింటుందని ప్రొఫెసర్ జయశంకర్ వ్యవసాయ విశ్వవిద్యాలయం సెంటర్ ఫర్ నేచురల్ రిసోర్సెస్ ఎన్విరాన్మెంట్ డైరెక్టర్ డాక్టర్ వి. రాములు హెచ్చరించారు. ఆయన ఇటీవల ఓ ఇంటర్వ్యూలో ఈ విషయాలు వెల్లడించారు.

రైతులు పంట కోతల తర్వాత వరి, మొక్కజొన్న, పత్తి వంటి వ్యర్థాలను కాల్చేస్తున్నారు. వర్షాకాలం సాగు కోసం త్వరగా పొలం ఖాళీ చేయాలనే ఆతృతతోనే ఈ పరిస్థితి ఏర్పడుతోందని ఆయన వివరించారు. కానీ ఇలా చేయడం వల్ల నేలలోని సూక్ష్మజీవులు, వానపాములు చనిపోతాయి. నేలలో తేమ ఆవిరై, భూసారం తగ్గుతుంది.

పంట వ్యర్థాల కాల్చివేత వల్ల విడుదలయ్యే విషవాయువులు వాతావరణ కాలుష్యానికి దారితీస్తాయి. సమీప గ్రామాల ప్రజల్లో శ్వాసకోశ సమస్యలు, అలర్జీలు పెరుగుతున్నాయని డాక్టర్ రాములు చెప్పారు. ఇటీవల జయశంకర్ భూపాలపల్లె జిల్లాలో పంటకొయ్యలు కాల్చడంతో చెలరేగిన మంటల్లో ముగ్గురు వ్యక్తులు చనిపోయిన సంఘటన కూడా జరిగింది.

జాతీయ హరిత ట్రిబ్యునల్ (NGT) నిబంధనల ప్రకారం పంట వ్యర్థాలు కాల్చడం నేరం. పొలంలో కాలిస్తే రూ.5,000 వరకు, బహిరంగ ప్రదేశాల్లో కాలిస్తే రూ.25,000 వరకు జరిమానా విధించే అవకాశం ఉందని ఆయన తెలిపారు. ప్రస్తుతం రాష్ట్ర ప్రభుత్వం ఉపగ్రహ సాంకేతికత (satellite technology) ద్వారా కాల్పులను గుర్తించి స్థానిక అధికారులను అప్రమత్తం చేస్తోంది.

పంట వ్యర్థాలు కాల్చకుండా వాటిని సేంద్రియ ఎరువుగా మార్చుకునే అవకాశాలు ఉన్నాయని డాక్టర్ రాములు సూచించారు. రోటవేటర్, షెడ్డర్ వంటి యంత్రాలతో వ్యర్థాలను ముక్కలు చేసి పొలంలోనే కలియదున్నాలి. బ్యాక్టీరియా సేంద్రియ ద్రావణాలు పిచికారీ చేస్తే రెండు వారాల్లో ఆ వ్యర్థాలు కుళ్లిపోతాయి. వీటిని కాగితం పరిశ్రమకు అమ్మవచ్చు లేదా కంపోస్టుగా మార్చుకోవచ్చు.

వాతావరణ మార్పుల నేపథ్యంలో ప్రతి రైతు సుస్థిర వ్యవసాయ పద్ధతులు అనుసరించాలని, గ్రామ స్థాయిలో మరింత అవగాహన కల్పించాల్సిన అవసరం ఉందని డాక్టర్ రాములు నొక్కి చెప్పారు.