వర్షాభావంతో పంటలు ఎండిపోతున్న తరుణంలో మెడిగడ్డ నుంచి 63 వేల క్యూసెక్కుల వరద విడుదల

తెలంగాణలో వర్షాభావంతో సాగు నీరు అందక పంటలు ఎండిపోతున్నాయి.

కరీంనగర్ జిల్లా గంగాధర మండలం రంగారావుపల్లిలో రైతులు ట్యాంకర్లతో నారుమడులకు నీళ్లు పోస్తున్న దృశ్యాలు వెలుగులోకి వచ్చాయి.

మరోవైపు భూపాలపల్లి జిల్లా మెడిగడ్డ బ్యారేజ్‌కు భారీ వరద నీరు చేరుతోంది. ప్రస్తుతం 63,000 క్యూసెక్కుల వరద 85 గేట్ల ద్వారా దిగువకు విడుదల చేస్తున్నారు. దీంతో ఎగువకు నీరు నిల్వ లేకుండా కిందకు ప్రవహిస్తోంది.

ఈ నేపథ్యంలో బీఆర్ఎస్ వర్కింగ్ ప్రెసిడెంట్ కేటీఆర్ నేడు కన్నేపల్లి పంపు హౌస్‌ను సందర్శించనున్నారు. గోదావరి వరద జలాల పరిస్థితిని ఆయన పరిశీలించనున్నారు. అనంతరం మీడియాతో మాట్లాడతారు.

రాష్ట్రంలో జలాశయాల్లో నీటి నిల్వలు 32.34 శాతానికి చేరాయి. శ్రీశైలం ప్రాజెక్టుకు 16 నుంచి 20 టీఎంసీల నీరు మాత్రమే వస్తోంది. ప్రాణహిత నది వరద 63,000 క్యూసెక్కులకు పెరిగింది.

ఖరీఫ్ సాగు 24 శాతం మాత్రమే జరిగింది. 1.35 కోట్ల ఎకరాల్లో 33 లక్షల ఎకరాల్లోనే పంటలు వేశారు. నిరుడు ఇదే సమయంలో 45 లక్షల ఎకరాల్లో సాగు జరిగింది. 20 జిల్లాల్లో లోటు వర్షపాతం నమోదైంది.

జూలైలోనూ ఇదే పరిస్థితి కొనసాగుతుందని వాతావరణ శాఖ హెచ్చరించింది. సాగు, తాగునీటికి ఇబ్బందులు తప్పవని సూచించింది. నీటి వినియోగంలో నియంత్రణ అవసరమని వాతావరణ శాఖ పేర్కొంది.

యూరియా ఎరువుల కొరత కూడా ఏర్పడింది. ఎకరానికి రెండు బస్తాలే యూరియా సరఫరా అవుతోంది. 20 రోజులకు ఒకసారి మాత్రమే ఎరువుల పంపిణీ జరుగుతోంది.