జానపద కళాకారుడు దురిశెట్టి రామయ్యకు సంగీత నాటక అకాడమీ అవార్డు

తెలంగాణలోని పెద్దపల్లి జిల్లా సుల్తానాబాద్ మండలం గర్రపల్లికి చెందిన దురిశెట్టి రామయ్య అనే జానపద కళాకారుడు జాతీయ సంగీత నాటక అకాడమీ పురస్కారానికి ఎంపికయ్యారు. 200 ఏళ్లకు పైగా చరిత్ర ఉన్న కడ్డితంత్రి తంబూరా అనే అరుదైన వాద్యాన్ని సజీవంగా ఉంచినందుకు కేంద్ర ప్రభుత్వం ఈ అవార్డును ప్రకటించింది.

రామయ్య తన తండ్రి రామానుజం నుండి ఈ కళను వారసత్వంగా అందుకుని 1974 నుండి కడ్డితంత్రిని వాయిస్తున్నారు. చేత్తో కాకుండా రెండు పుల్లలతో వాయించే ఈ ప్రత్యేకమైన వాద్యం ద్వారా 32 రకాల స్వరాలను పలికించవచ్చని ఆయన చెబుతున్నారు. రామాయణం, భాగవతం, మహాభారతం వంటి పురాణ కథలను చెప్పడంలో ఈ వాద్యాన్ని పూర్వం విస్తృతంగా ఉపయోగించేవారు.

దేశవ్యాప్తంగా ఎన్నో ప్రదర్శనలు ఇచ్చిన రామయ్య, సారా నిషేధం, అక్షరాస్యత, జన్మభూమి వంటి ప్రభుత్వ కార్యక్రమాల్లో కూడా తన కళను ప్రదర్శించారు. ఎన్టీ రామారావు, చంద్రబాబు నాయుడు, కేసీఆర్ సహా పలువురు ముఖ్యమంత్రులు, ఉన్నతాధికారులు ఈయనను సన్మానించారు. 2017లో తెలంగాణ ఆవిర్భావ దినోత్సవం సందర్భంగా అప్పటి ముఖ్యమంత్రి కేసీఆర్ రూ. లక్ష నగదు పారితోషికం అందజేసి ఘనంగా సత్కరించారు.

ప్రస్తుతం డెబ్బై ఏళ్ళ వయస్సులోనూ కడ్డితంత్రి కళను విడువకుండా కొనసాగిస్తున్నారు. ఆయన కుటుంబ సభ్యులు మాట్లాడుతూ, "తెలంగాణలో ఈ వాద్యం వాయించే కుటుంబాలు కొన్ని ఉన్నా రామయ్య ఒక్కరే చురుగ్గా ప్రదర్శనలు ఇస్తున్నారు. ఈ తరం వారికి ఈ వాయిద్యం గురించి అసలు తెలియదు. మా తాతకు అవార్డు రావడం మాకు చాలా గర్వంగా ఉంది" అని తెలిపారు.

త్వరలో రాష్ట్రపతి చేతుల మీదుగా రామయ్య ఈ పురస్కారాన్ని అందుకోనున్నారు. ఆయన చేసిన పరిశోధనలో భాగంగా కడ్డితంత్రి వాయిద్యానికి 'ఇండియన్ మ్యూజిక్' పుస్తకంలో కూడా చోటు లభించింది.