వెల్ఫేర్ గ్రూప్ కేసులో వైసీపీ నేత మల్ల విజయప్రసాద్ ఇళ్లు, కార్యాలయాల్లో ED సోదాలు

విశాఖపట్నం, హైదరాబాద్‌లో వైసీపీ నేత మల్ల విజయప్రసాద్ నివాసాలు, కార్యాలయాల్లో ఎన్‌ఫోర్స్‌మెంట్ డైరెక్టరేట్ (ED) అధికారులు ఏకకాలంలో సోదాలు నిర్వహిస్తున్నారు. వెల్ఫేర్ గ్రూప్ ఆఫ్ కంపెనీల అక్రమాల కేసులో ఐదు ప్రాంతాల్లో ఈ దాడులు జరుగుతున్నాయి.

10 మంది ED అధికారుల బృందం సీతమ్మధారలోని విజయప్రసాద్ నివాసంతోపాటు ఇతర చోట్ల సోదాలు చేస్తోంది. భద్రత కోసం సీఆర్పీఎఫ్ దళం ఏర్పాటు చేశారు. ఆర్థిక లావాదేవీల్లో అవకతవకలు, ఎక్కువ వడ్డీలు చెప్పి ప్రజలను మోసం చేశారన్న ఆరోపణలపై ఈ విచారణ జరుగుతోంది.

ఈ కేసుకు సంబంధించి 2011లో కోల్‌కతాలో, 2016లో జార్ఖండ్‌లో, 2021లో ఒడిశా సీఐడీ కేసులు నమోదయ్యాయి. వెల్ఫేర్ గ్రూప్‌పై సీబీఐ కేసు కూడా ఉంది. ఈ కేసులన్నింటినీ కలిపి ED స్వీకరించి ప్రస్తుతం సోదాలు చేస్తోంది. రూ.2,000-3,000 కోట్ల విలువైన లావాదేవీల్లో అవకతవకలు జరిగినట్లు ఆరోపణలు ఉన్నాయి.

మల్ల విజయప్రసాద్ వైసీపీ విశాఖ పశ్చిమ నియోజకవర్గ సమన్వయకర్తగా ఉన్నారు. గతంలో వైసీపీ ప్రభుత్వ హయాంలో ఏపీ విద్యా మౌలిక సదుపాయాల సంస్థ చైర్మన్‌గా కూడా పనిచేశారు. సోదాలు ఉదయం నుంచి కొనసాగుతున్నాయి.