డీఎస్సీ-2025: సాక్షి కథనాన్ని ఖండించిన విద్యాశాఖ, ఆరోపణలు నిరాధారం

డీఎస్సీ-2025 నియామకాలపై సాక్షి పత్రిక ప్రచురించిన కథనాన్ని ఆంధ్రప్రదేశ్ విద్యాశాఖ ఖండించింది. రిజర్వేషన్లు, ఎంపిక ప్రక్రియ, ఎంఎస్పీ కోటాపై చేసిన ఆరోపణలన్నీ నిరాధారమైనవని స్పష్టం చేసింది.

ప్రభుత్వ నిబంధనలు, జీఓలు, రిజర్వేషన్ విధానాల ప్రకారమే అన్ని నియామకాలు జరిగాయని విద్యాశాఖ తెలిపింది. టెట్, టీఎస్సీ నిబంధనలను, కోర్టు ఆదేశాలను పూర్తిగా పాటించామని వెల్లడించింది. దరఖాస్తుల పరిశీలనలో పారదర్శకత, న్యాయబద్ధత పాటించామని వివరించింది.

అభ్యర్థుల నుంచి వచ్చిన ప్రతి అభ్యంతరాన్ని అధికారులు పరిశీలించారని, గ్రీవెన్స్ కమిటీలు, అప్పీల్ వ్యవస్థ ద్వారా ఫిర్యాదులు పరిష్కరించామని విద్యాశాఖ ప్రకటించింది. 33,830 ఫిర్యాదులు వచ్చాయన్న ప్రచారం అవాస్తవమని కొట్టిపారేసింది. చాలా అభ్యంతరాలు సాధారణ సాంకేతిక ధృవపత్రాలకు సంబంధించినవేనని తెలిపింది.

ఎంఎస్పీ కోటా అమలు జీవో ప్రకారమే జరిగిందని, ఎంఎస్పీ అభ్యర్థులకు అన్యాయం జరిగిందన్న ఆరోపణలు అసత్యమని స్పష్టం చేసింది. వాస్తవాలను వక్రీకరించే కథనాలతో అభ్యర్థుల్లో ఆందోళన సృష్టించవద్దని విద్యాశాఖ విజ్ఞప్తి చేసింది.