ఎగ్ అమినో ఆమ్లం తయారీపై పశ్చిమ గోదావరిలో రైతులకు శిక్షణ

పశ్చిమ గోదావరి జిల్లాలో ప్రకృతి వ్యవసాయ విభాగం అధికారులు రైతులకు ఎగ్ అమినో ఆమ్లం (Egg Amino Acid) తయారీపై శిక్షణ ఇస్తున్నారు. ఇది తక్కువ ఖర్చుతో తయారయ్యే సేంద్రియ గ్రోత్ ప్రమోటర్. పంట పూత, కాత దశలో దీని వాడకం వల్ల మంచి ఫలితాలు లభిస్తున్నాయి.

ఈ ద్రావణం తయారు చేయడానికి 12 కోడిగుడ్లు, 50 నుంచి 60 నిమ్మకాయల రసం, 1/4 కిలోగ్రాము బెల్లం అవసరం. ముందుగా గుడ్లను ఒక ప్లాస్టిక్ లేదా గాజు పాత్రలో ఉంచి, నిమ్మరసం పూర్తిగా ముంచేలా పోయాలి. పాత్రకు మూత పెట్టి 10 రోజులు ఉంచాలి. ప్రతిరోజు మూత తీసి లోపల గ్యాస్ విడుదల చేసి మళ్లీ మూసివేయాలి. 11వ రోజున చేత్తో కలిపి, వడగట్టాలి. ఆ తర్వాత 1/4 లీటర్ నీటిలో కరిగించిన బెల్లం కలపాలి. ఈ ద్రావణాన్ని మూడు నెలల వరకు నిల్వ చేయవచ్చు.

ఇలా తయారైన ద్రావణాన్ని 250 ml ని 100 లీటర్ల నీటిలో కలిపి ఒక ఎకరాకు పిచికారీ చేస్తారు. ఆకుల ద్వారా మొక్కలు పోషకాలు పీల్చుకుంటాయి. రసాయన ఎరువులు లేకుండానే పంట దిగుబడి పెరుగుతుంది. ఈ పద్ధతి ఖర్చు సుమారు రూ. 40-50 లోపే ఉంటుంది. రైతులు సామూహికంగా తయారు చేసుకుంటే ఖర్చు మరింత తగ్గుతుంది.