ఎల్నినో ప్రభావం: కర్నూలు, నంద్యాలలో పంటలు ఎండిపోతున్నాయి, రైతులు వలసలు

ఎల్నినో ప్రభావంతో కర్నూలు, నంద్యాల జిల్లాల్లో జులైలో సాధారణం కంటే 57% తక్కువ వర్షపాతం నమోదైంది. దీంతో పంటలు ఎండిపోతున్నాయి. రైతులు పంటలను దున్నేస్తున్నారు. కుటుంబ సమేతంగా నగరాలకు వలసపోతున్నారు.

కర్నూలు జిల్లాలో ఖరీఫ్ సాధారణ సాగు 4.35 లక్షల హెక్టార్లు కాగా, ఇప్పటివరకు 3.03 లక్షల హెక్టార్లలో మాత్రమే పంటలు సాగయ్యాయి. జులైలో సాధారణ వర్షపాతం 90.5 మిల్లీమీటర్లు కాగా కేవలం 38.8 మిల్లీమీటర్లు మాత్రమే నమోదైంది. నంద్యాల జిల్లాలో 43% లోటు వర్షపాతం నమోదైంది.

కర్నూలు జిల్లాలోని హలాహర్వి, దేవనకొండ, కృష్ణగిరి, వెల్దొడ్డి, పత్తికొండ మండలాల్లో వరుసగా 35 రోజులు వర్షాలు లేక డ్రై స్పెల్ నమోదైంది. మంత్రాలయం, కోసిగి, కౌతాళం, ఎమ్మిగనూరు తదితర 16 మండలాల్లో 28 రోజులుగా వర్షం కురవలేదు. తుగ్గలి మండలంలో అతి తక్కువ వర్షపాతం నమోదైంది.

పత్తి, వేరుశనగ, కంది, ఉల్లి, మిర్చి, మొక్కజొన్న, టమాటా వంటి పంటలు పూర్తిగా ఎండిపోయాయి. వర్షం కోసం రైతులు గాడిదలకు, కప్పలకు పెళ్లిళ్లు చేయిస్తున్నారు. అభిషేకాలు, సర్వమత ప్రార్థనలు చేస్తున్నారు. పండ్ల తోటలకు నీటి కొరత ఏర్పడింది. అరటి, దానిమ్మ తోటలను ట్యాంకర్లతో నీరు తెచ్చి కాపాడుకుంటున్నారు. పశుగ్రాసం దొరకక పాల ఉత్పత్తి పడిపోయింది.

ఆగస్టు మొదటి వారంలో వర్షాలు కురవకపోతే ఖరీఫ్ పంటలు పూర్తిగా నష్టమయ్యే అవకాశం ఉందని వ్యవసాయాధికారులు ఆందోళన వ్యక్తం చేస్తున్నారు.