ఎల్ నినో ప్రభావం: దివిసీమలో ఖరీఫ్ పంటల సాగు నిలిచిపోయింది

ఎల్ నినో ప్రభావంతో కృష్ణా జిల్లా దివిసీమ ప్రాంతంలో ఖరీఫ్ పంటల సాగు తీవ్రంగా ప్రభావితమైంది. వర్షాభావం కారణంగా ఇప్పటివరకు సాధారణ విస్తీర్ణంలో సగం కూడా పంటలు సాగు కాలేదు.

అవనిగడ్డ, నాగాయలంక, కోడూరు మండలాల్లో సుమారు 80 వేల ఎకరాల్లో ఏటా వరి సాగయ్యేది. ఈ ఏడాది ఒక్క ఎకరంలో కూడా నాట్లు వేయలేదు. గంటసాల, చల్లపల్లి, మోపిదేవి మండలాల్లో అరకొరగా వరి సాగు జరుగుతోంది.

కాలువల్లో నీరు సరిపడా లేకపోవడంతో రైతులు బోర్ల సాయంతో నారుమళ్ళు వేసినా, చెరువులు, బోర్లు ఎండిపోవడంతో మళ్ళు కాపాడుకోవడం కష్టంగా మారింది. నీటి కోసం ఆయిల్ ఇంజన్లు వాడుతుండగా ఎకరానికి రూ.2,000 అదనపు ఖర్చు అవుతోంది.

వర్షాలు పడతాయా లేదా అనే అనిశ్చితితో రైతులు ఆకాశం వైపు చూస్తున్నారని స్థానికులు తెలిపారు. వ్యవసాయ కూలీలకు పనులు లేక ఇబ్బందులు ఎదురవుతున్నాయి. ఈ పరిస్థితి గతంలో ఎన్నడూ లేదని రైతులు ఆవేదన వ్యక్తం చేస్తున్నారు.