ఎల్నినో హెచ్చరికల నేపథ్యంలో రాగి సాగు పద్ధతులు.. శ్రీకాకుళం కేవీకే శాస్త్రవేత్త సూచనలు

ఈ ఖరీఫ్ సీజన్‌లో ఎల్నినో ప్రభావం ఉంటుందని భారత వాతావరణ శాఖ హెచ్చరించింది. వర్షాలు తగ్గడం, ఆలస్యం కావడం వల్ల రైతులు నీటి అధిక వినియోగం ఉన్న పంటలకు బదులు తక్కువ నీటితో పండే చిరుధాన్యాలను ఎంచుకోవాలని శాస్త్రవేత్తలు సూచిస్తున్నారు. ఈ క్రమంలో శ్రీకాకుళం జిల్లా ఆముదాలవలస కృషి విజ్ఞాన కేంద్రం శాస్త్రవేత్త డాక్టర్ కిరణ్ కుమార్, రాగి పంట సాగు వివరాలు రైతులతో పంచుకున్నారు.

రాగి అన్ని రకాల నేలల్లో, ముఖ్యంగా సారం తక్కువ ఉన్న నేలల్లోనూ బాగా పండుతుంది. జూన్-జులై నెలల్లో దీన్ని ఖరీఫ్ పంటగా సాగు చేయొచ్చు. నాటు పద్ధతిలో విత్తనం ఎకరాకు 2 కిలోలు, వెదజల్లే పద్ధతిలో 5 కిలోలు సరిపోతుంది. విత్తే ముందు థైరామ్ లేదా క్యాప్టాన్ పొడిమందుతో విత్తన శుద్ధి చేసుకోవాలి. దీంతో అగ్గి తెగులు, పొడ తెగులు నుంచి పంట రక్షణ పొందవచ్చు.

రాగి రకాల్లో శ్రీచైతన్య, ఇంద్రావతి, సీఎఫ్ఎం-1, సీఎఫ్ఎం-4 వంటివి అందుబాటులో ఉన్నాయి. స్వల్పకాలిక రకాలను (80-90 రోజులు) 15 సెంటీమీటర్ల వరుస అంతరంతో, మొక్కల మధ్య 10 సెంటీమీటర్ల దూరంతో నాటాలి. దీర్ఘకాలిక రకాలకు (100 రోజులకు మించి) 15-20 సెంటీమీటర్ల వరుస అంతరం పాటించాలి. ఎరువుల విషయంలో ఎకరాకు 43 కిలోల యూరియా, 23 కిలోల డీఏపీ, 13 కిలోల మ్యురేట్ ఆఫ్ పొటాష్ వేస్తే సరిపోతుంది. యూరియాను సగం విత్తేప్పుడు, మిగిలిన సగం 30 రోజుల తర్వాత రెండు దఫాలుగా వేయాలి.

కలుపు యాజమాన్యానికి విత్తిన వెంటనే పెండిమెథాలిన్ (600 మి.లీ./200 లీ. నీళ్లు) పిచికారీ చేయాలి. 20-25 రోజుల వయసులో 2,4-డి సోడియం సాల్ట్ (2 గ్రాములు/లీటర్) పిచికారీ చేస్తే కూర జాతి మొక్కలు నియంత్రించబడతాయి. 15-18 రోజుల వ్యవధిలో బైస్పైరిబాక్ సోడియం (50 మి.లీ./200 లీ.) పిచికారీ చేస్తే గడ్డి జాతి, కూర జాతి రెండింటిని అరికట్టవచ్చు.

చీడపీడల విషయంలో చెదల రాకుండా పుట్టల్లో క్లోరిపైరిఫాస్ (5 మి.లీ./లీటరు) ద్రావణం పోయాలి. గులాబీ రంగు పురుగు తెల్లకంకిని కలిగిస్తుంది; దీనిని క్లోరాంట్రానిలిప్రోల్ (60 మి.లీ./200 లీ.)తో నివారించాలి. శెనగపచ్చ పురుగుకు క్వినాల్ఫాస్ (2 మి.లీ./లీటర్) వాడాలి. కత్తెర పురుగుకు స్పైనోసైడ్ లేదా క్లోరాంట్రానిలిప్రోల్ (60 మి.లీ./200 లీ.) పిచికారీ చేయాలి. అగ్గి తెగులు కనిపిస్తే ట్రైసైక్లోజోల్ (0.6 గ్రాములు/లీటరు) పిచికారీ చేసి నివారించొచ్చు.

ఈ యాజమాన్య పద్ధతులు పాటిస్తే తక్కువ పెట్టుబడితో అధిక దిగుబడి, నికర ఆదాయం లభించే అవకాశం ఉందని డాక్టర్ కిరణ్ కుమార్ తెలిపారు.