ఎల్నినో హెచ్చరిక: కృష్ణా బేసిన్‌లో 20% వర్షపాతం తగ్గే అవకాశం – ప్రభుత్వ ప్రత్యామ్నాయ ప్రణాళికలు

ఎల్నినో ప్రభావం కారణంగా ఈ ఏడాది కృష్ణా నదీ పరీవాహక ప్రాంతంలో వర్షపాతం 20 శాతానికిపైగా తగ్గే అవకాశం ఉందని ఆంధ్రప్రదేశ్ జలవనరుల శాఖ అంచనా వేసింది. ఈ నేపథ్యంలో ప్రభుత్వం రైతులకు ఆసరా కల్పించేందుకు ప్రత్యామ్నాయ వ్యూహాలు సిద్ధం చేస్తోంది.

ఇప్పటికే ప్రకటించిన షెడ్యూల్ ప్రకారం మే 4న పెన్నా డెల్టాకు నీరు విడుదలైంది. గోదావరి డెల్టాకు నేడు దవళేశ్వరం ఆనకట్ట నుంచి ప్రజాప్రతినిధులు సాగునీరు విడుదల చేశారు. జూన్-జులై నెలాఖరు నాటికి 17 సాగునీటి ప్రాజెక్టుల ద్వారా షెడ్యూల్ ప్రకారం నీరు అందించాలని ప్రభుత్వం ప్రణాళిక రచించింది. పోలవరం ప్రాజెక్టుతో పాటు వెలిగొండ ప్రాజెక్టు పనులు త్వరితగతిన పూర్తి చేయడంపై ప్రత్యేక దృష్టి పెట్టారు.

కృష్ణా డెల్టా పరిధిలో ఐదు జిల్లాల్లో 13 లక్షల ఎకరాలకు సాగునీరు అందే కీలక ప్రాంతం. శ్రీశైలం, నాగార్జున సాగర్ జలాశయాల నుంచి నీటి లభ్యత తగ్గే అవకాశాలు గమనించిన జలవనరుల శాఖ, వ్యవసాయ శాఖ సంయుక్తంగా సమీక్ష నిర్వహించాయి. కలెక్టర్లకు క్షేత్రస్థాయిలో తీసుకోవాల్సిన జాగ్రత్తలపై ఆదేశాలు ఇచ్చారు.

ఆగస్టు నెలలో వర్షాలు కురిసే అవకాశం ఉందని అంచనా. లభ్యమయ్యే నీటిని సద్వినియోగం చేసుకోవాలని, అవసరమైతే ధాన్యంతో పాటు కాయగూరలు, ఉద్యానవన పంటలు సాగు చేయాలని ప్రభుత్వం రైతులకు విజ్ఞప్తి చేసింది. జలవనరులు-వ్యవసాయ శాఖల మధ్య సమన్వయం పెంచి, రైతులకు అవగాహన కల్పిస్తామని అధికారులు తెలిపారు.