ఎల్నినో ప్రభావంతో ఈ ఏడాది వర్షాలు తగ్గుతాయి; రైతులు అప్రమత్తంగా ఉండాలని సూచన

ఎల్నినో ప్రభావం వల్ల ఈ ఏడాది తెలంగాణలో నైరుతి రుతుపవనాల వర్షాలు గణనీయంగా తగ్గే అవకాశం ఉందని వాతావరణ నిపుణులు హెచ్చరిస్తున్నారు. పసిఫిక్ మహాసముద్రంలో వెచ్చని ప్రవాహాలు పెరిగి ఎల్నినో పరిస్థితి ఏర్పడింది. దీని వల్ల నైరుతి రుతుపవనాలు బలహీనంగా మారుతాయని వివరించారు.

గతంలో రికార్డు స్థాయిలో ఎండలు నమోదయ్యాయి. ఈ వేసవి తర్వాత వచ్చే వర్షాలు తక్కువగా ఉంటామని, రైతులు అప్రమత్తంగా ఉండాలని వారు సూచించారు. ఒకటి రెండు వర్షాలు పడగానే దుక్కి దున్ని విత్తనాలు వేయవద్దని, సరిపడా తేమ రాకపోతే పంట నష్టం జరుగుతుందని హెచ్చరించారు.

నదులు, ప్రాజెక్టుల్లో నీటి మట్టాలు ఆశించిన స్థాయిలో పెరగవని అధికారులు తెలిపారు. కృష్ణా, గోదావరి నదులకు వరదలు వచ్చే అవకాశం తక్కువగా ఉంది. రాబోయే 40 రోజుల్లో వాతావరణం అనుకూలించకపోతే సాగునీటి కొరత ఏర్పడవచ్చని వివరించారు.

రైతులకు శాస్త్రవేత్తలు కొన్ని సూచనలు చేశారు. నీటి అవసరం తక్కువగా ఉండే పంటలు ఎంచుకోవాలని, అధికంగా ఎరువులు, పురుగు మందులు వాడకుండా సంప్రదాయ వ్యవసాయ పద్ధతులు పాటించాలని సలహా ఇచ్చారు. వ్యవసాయాధికారులు కూడా ఇదే విషయాన్ని నొక్కి చెప్పారు.