ఎల్ నినో ప్రభావం: రొయ్యల సాగుకు పెను సవాల్, రైతులకు శాస్త్రవేత్తల సూచనలు

ఎల్ నినో ప్రభావంతో తీర ప్రాంతాల్లో రొయ్యల సాగు తీవ్రంగా ప్రభావితమవుతోంది. వాతావరణ ఉష్ణోగ్రతలు పెరగడం, వర్షపాతం తగ్గడం వల్ల చెరువుల నీటి నాణ్యత క్షీణిస్తోంది. దీంతో రొయ్యలు ఒత్తిడికి గురై ఎదుగుదల మందగించింది. పలు వ్యాధులు ప్రబలుతున్నాయి.

నెల్లూరు జిల్లాకు చెందిన ఒక రైతు తన 10 ఏళ్ల అనుభవంలో ఇటువంటి ప్రభావం ఇప్పుడే చూస్తున్నానని తెలిపారు. రోజుకోసారి ఎండ, చలి మారడం వల్ల రొయ్యల మేత తినడం తగ్గిందన్నారు. 80% మంది రైతులకు వైట్ గట్ సమస్య ఎదురవుతోందని, ఎఫ్సిఆర్ దెబ్బతినడంతో టన్నేజ్ తగ్గిందని ఆయన వివరించారు. భూగర్భ జలాలు తగ్గడం వల్ల నీటి పారామీటర్లు కూడా మారిపోయాయని చెప్పారు.

నెల్లూరు జిల్లా ముత్తుకూరుకు చెందిన ప్రొఫెసర్ తమ్మిరెడ్డి నీరజ ఈ పరిస్థితిపై సూచనలు చేశారు. అధిక ఉష్ణోగ్రతల వల్ల నీటిలో ఆక్సిజన్ స్థాయిలు తగ్గుతాయని, దీనివల్ల రొయ్యల ఆహారం తీసుకోవడం ఆగిపోతుందని తెలిపారు. అమ్మోనియా, నైట్రేట్ స్థాయిలు పెరగడంతో వ్యాధులు వ్యాప్తి చెందుతున్నాయని, ముఖ్యంగా వైట్ స్పాట్, ఈహెచ్పీ, విబ్రియో, రన్నింగ్ మోర్టాలిటీ సిండ్రోమ్ వంటి వ్యాధులు ప్రబలుతున్నాయని వివరించారు.

నివారణ చర్యల గురించి ఆమె మాట్లాడుతూ, నీటి మట్టం కనీసం 5 అడుగులు ఉంచాలని సూచించారు. అధిక ఉష్ణోగ్రతలు, ముసురు పట్టిన సమయాల్లో రోజువారీ మేతలో 20-30 శాతం తగ్గించాలన్నారు. ఆక్సిజన్ పెంచేందుకు ఏరేటర్ల సంఖ్య పెంచుకోవాలని, తక్కువ రొయ్య పిల్లలు వదలడం ద్వారా ఒత్తిడి తగ్గించుకోవచ్చని చెప్పారు. చెరువు అడుగున సేంద్రియ పదార్థాన్ని తొలగించి బయో సెక్యూరిటీ చర్యలు పాటించాలన్నారు.

ఇదిలా ఉండగా, రాష్ట్ర మత్స్య శాఖ ఎల్ నినో సెల్‌ ఏర్పాటు చేస్తోంది. ఈ 24 గంటల సెల్ ద్వారా రైతులకు వాతావరణ మార్పులు, వ్యాధి నియంత్రణపై సమాచారం యాప్ ద్వారా అందిస్తారు. రైతులు తమ ఫోన్ నంబర్లు నమోదు చేసుకోవాలని అధికారులు కోరుతున్నారు. శాస్త్రీయ యాజమాన్య పద్ధతులతో నష్టాలను తగ్గించుకోవచ్చని నిపుణులు స్పష్టం చేస్తున్నారు.