ఎల్నినో ప్రభావంతో తెలంగాణలో 32 లక్షల ఎకరాల్లో సాగు తగ్గే అవకాశం: వ్యవసాయ శాఖ నివేదిక

ఎల్నినో ప్రభావంతో తెలంగాణలో వర్షాల లోటు ఏర్పడింది. దీంతో సాగునీటి కొరత తీవ్రమై 32.20 లక్షల ఎకరాల్లో పంటల సాగు తగ్గుతుందని వ్యవసాయ శాఖ అంచనా వేసింది.

గత సంవత్సరం వానాకాలంలో 1.39 కోట్ల ఎకరాల్లో పంటలు సాగయ్యాయి. ఈ సీజన్లో అది 1.07 కోట్ల ఎకరాలకే పరిమితం కానుంది. అంటే 23 శాతం సాగు తగ్గుతుంది.

వరిసాగుపై అత్యధికంగా ప్రభావం పడుతుంది. గతేడాది 70 లక్షల ఎకరాల్లో వరి పండగా, ఈసారి 38.51 లక్షల ఎకరాల్లో మాత్రమే సాగవుతుందని నివేదిక చెబుతోంది. 31.38 లక్షల ఎకరాల్లో వరిసాగు తగ్గుతుంది. పత్తి సాగు 4.77 లక్షల ఎకరాలు, మొక్కజొన్న 40 వేల ఎకరాలు తగ్గే అవకాశం ఉంది.

రాష్ట్రంలో 23 జిల్లాల్లో, 360 మండలాల్లో లోటు వర్షపాతం నమోదైంది. అత్యంత లోటు 39 మండలాల్లో ఉంది. గ్రామాలపై ప్రభావం పరంగా 7,939 గ్రామాల్లో మధ్యస్థం, 892 గ్రామాల్లో తీవ్రం, 2,320 గ్రామాల్లో స్వల్పంగా ఉన్నట్లు వ్యవసాయ శాఖ నివేదిక పేర్కొంది.

ప్రస్తుతం ఇప్పటివరకు 73.36 లక్షల ఎకరాల్లో పంటలు సాగయ్యాయి. గత ఏడాది ఇదే సమయానికి 78 లక్షల ఎకరాల్లో సాగైంది. ఈ తేడా 4.64 లక్షల ఎకరాలు.