ములుగు సెంటర్ ఆఫ్ ఎక్సలెన్స్లో ప్రయోగాత్మక అవకాడో సాగు ప్రారంభం

ములుగులోని సెంటర్ ఆఫ్ ఎక్సలెన్స్లో తెలంగాణ ఉద్యాన శాఖ ప్రయోగాత్మకంగా అవకాడో సాగు చేపట్టింది. మార్కెట్లో అవకాడోకు డిమాండ్ పెరగడంతో ఈ నిర్ణయం తీసుకున్నారు. దీనిని వెన్నపండు అని కూడా అంటారు.

ఒక ఎకరంలో సుమారు 160 మొక్కలు నాటారు. బెంగళూరు ఉద్యాన పరిశోధన సంస్థ రూపొందించిన అర్కా సుప్రీం, అర్కా కుర్గు రవి అనే రెండు రకాలను ఎంపిక చేశారు. క్రాస్ పాలినేషన్ కోసం ఈ రెండు రకాలను కలిపి నాటాలని అధికారులు తెలిపారు.

అవకాడో మొదటి దిగుబడికి కనీసం మూడేళ్లు పడుతుందని అధికారులు చెప్పారు. అందుకే అంతర పంటలుగా బొప్పాయి, బంతిపూలు సాగు చేస్తున్నారు. బంతి 2-3 నెలల్లో, బొప్పాయి 7-8 నెలల్లో ఆదాయం ఇస్తాయని తెలిపారు.

మూడో సంవత్సరం నుంచి చెట్టుకు 10 కిలోల అవకాడో రాగలదని అంచనా. ఐదో సంవత్సరం నుంచి 30-40 కిలోలు, ఎనిమిదో సంవత్సరం నుంచి 75-100 కిలోలు వస్తాయని అధికారులు పేర్కొన్నారు. కిలో అవకాడో ధర రూ.250-300 వరకు ఉన్నట్లు చెప్పారు. ఎకరాకు 1.6-1.7 టన్నుల దిగుబడి వచ్చే అవకాశం ఉందని తెలిపారు. పెట్టుబడి రూ.1-1.5 లక్షలు కాగా, ఐదో సంవత్సరం నుంచి రైతుకు రూ.4-5 లక్షల నికర ఆదాయం వచ్చే అవకాశం ఉందని అంచనా వేశారు.

ఈ ప్రయోగం ద్వారా సాగు సాధకబాధకాలను అధ్యయనం చేస్తామన్నారు. ఆ తర్వాత రైతులకు మెరుగైన సూచనలు అందిస్తామని ఉద్యాన శాఖ అధికారులు తెలిపారు. భవిష్యత్తులో నాణ్యమైన మొక్కలు రైతులకు అందించే ప్రణాళిక ఉందని పేర్కొన్నారు.