బొల్లారం మద్రాస్ రెజిమెంట్ ఆయుధాల చోరీ: ముగ్గురు ఆర్మీ అధికారులు అదుపులో

బొల్లారంలోని మద్రాస్ రెజిమెంట్ ఆయుధాగారం నుంచి ఆయుధాలు చోరీ కేసులో కీలక పురోగతి కనిపించింది. దర్యాప్తు అధికారులు ముగ్గురు ఆర్మీ ఉన్నతాధికారులను అదుపులోకి తీసుకున్నారు.

మిలిటరీ ఇంటెలిజెన్స్ అధికారులు సేకరించిన ఆధారాల ప్రకారం ఆయుధాలు ఒకేసారి చోరీ కాలేదు. గత మూడు నెలలుగా ఆయుధాలు ఒక్కొక్కటిగా మాయమైనట్లు అధికారులు గుర్తించారు. ఇటీవల జరిగిన ఆయుధ ఆడిట్‌లో ఈ విషయం వెలుగులోకి వచ్చింది.

చోరీకి గురైన వాటిలో నాలుగు AK-47 రైఫిళ్లు, రెండు INSAS రైఫిళ్లు, తొమ్మిది పిస్టళ్లు ఉన్నాయి. వీటితో పాటు 2,000 కంటే ఎక్కువ బుల్లెట్లు దశలవారీగా మాయమైనట్లు మిలిటరీ ఇంటెలిజెన్స్ అధికారులు నిర్ధారించారు. ఆయుధాలను తరలించింది లోపలి వ్యక్తులేనని దర్యాప్తులో తేలింది.

తప్పిన ఆయుధాలు ఎక్కడికి చేరాయి, ఎవరు తరలించారు, ఏ ఉద్దేశంతో చేశారనే ప్రశ్నలపై దర్యాప్తు కొనసాగుతోంది. ఆయుధాలు సంఘ విద్రోహ శక్తులకు చేరాయా అనే కోణం నుంచి కూడా విచారణ జరుగుతోంది.

ఈ కేసును పోలీసులు, మిలిటరీ ఇంటెలిజెన్స్, జాతీయ దర్యాప్తు సంస్థ (NIA) అధికారులు విచారిస్తున్నారు. అదుపులో ఉన్న అధికారులను ప్రశ్నిస్తున్నారు.