ఎల్ నినో ప్రభావం: ఆర్టిసి బస్ స్టాండ్లలో నీటి కొరత, ట్యాంకర్లతో సరఫరా

ఎల్ నినో ప్రభావంతో హైదరాబాద్, శివారు ప్రాంతాల్లో నీటి ఎద్దడి తీవ్రమవుతోంది. ఈ ప్రభావం ఆర్టిసి బస్ స్టాండ్లపై పడింది. ఘట్కేసర్ బస్ స్టాండ్‌లో నీటి కొరత వల్ల మరుగుదొడ్లకు తాళాలు వేయాల్సి వచ్చింది.

అయితే ఆర్టిసి అధికారులు భిన్నంగా చెబుతున్నారు. ఘట్కేసర్‌లో బోరు చెడిపోవడంతో టాయిలెట్లకు తాళాలు వేశామని వారు తెలిపారు. ప్రస్తుతం అక్కడ నీటిని నిల్వ చేశామని చెబుతున్నారు. ట్యాంకర్ల ద్వారా నీరు తీసుకొచ్చి ప్రయాణికులకు ఇబ్బంది లేకుండా చర్యలు తీసుకుంటున్నట్లు తెలిపారు.

రాష్ట్రవ్యాప్తంగా 97 ఆర్టిసి డిపోల నుంచి దాదాపు 10 వేల బస్సులు నడుస్తున్నాయి. ఈ బస్సుల్లో రోజూ సుమారు 65 లక్షల మంది ప్రయాణికులు రాకపోకలు సాగిస్తారు. MGBS, JBS వంటి ప్రధాన స్టేషన్లలో రోజుకు 60 వేల నుంచి 80 వేల మంది వరకు ప్రయాణికులు ఉంటారు.

హైదరాబాద్ పరిధిలో MGBS, JBS, హయత్ నగర్, దిల్సుఖ్ నగర్, పటాన్‌చేరు, కూకట్‌పల్లి సహా 20 ప్రధాన బస్ స్టేషన్లలో నీటి నిర్వహణపై ప్రత్యేక దృష్టి పెట్టారు. రాష్ట్రవ్యాప్తంగా బస్ స్టేషన్లలో ఉచిత టాయిలెట్ సౌకర్యం అమలులో ఉంది. ఈ టాయిలెట్ల నిర్వహణకు ప్రధానంగా బోరు నీటినే వాడుతున్నారు.

బస్సుల శుభ్రత, మెయింటెనెన్స్‌కు కూడా భారీగా నీరు అవసరమవుతోంది. ఒక్కో బస్సు మెయింటెనెన్స్‌కు రోజుకు 100 లీటర్ల నీరు వినియోగమవుతోంది. బోరు సమస్య ఉన్న డిపోలకు ట్యాంకర్ల ద్వారా నీరు అందించేందుకు సిద్ధంగా ఉన్నట్లు అధికారులు చెబుతున్నారు. అవసరమైతే ట్రీటెడ్ వాటర్ వినియోగంపై నిర్ణయం తీసుకుంటామని తెలిపారు.

కరీంనగర్, వరంగల్, ఖమ్మం, నిజామాబాద్, ఆదిలాబాద్ వంటి జిల్లా కేంద్రాల్లోని ప్రధాన బస్ స్టేషన్లలో రద్దీ ఎక్కువగా ఉంటుంది. అక్కడా ఇదే తరహా ముందస్తు చర్యలు చేపట్టినట్లు అధికారులు తెలిపారు.