చంద్రపూర్ సావలీలో ఏనుగుల గుంపు ప్రవేశం.. గ్రామస్తులకు అటవీశాఖ హెచ్చరిక

మహారాష్ట్రలోని చంద్రపూర్ జిల్లా సావలీ తాలూకాలో ఏనుగుల గుంపు ప్రవేశించింది. గడ్చిరోలి నుంచి వైన్ గంగా నది దాటి వచ్చిన ఈ ఏనుగులు కరోలి, ఆకాపూర్, గేవరి శివారు ప్రాంతాల్లో సంచరిస్తున్నాయి.

ఏనుగుల రాకతో రైతులు, గ్రామస్థులు ఆందోళన చెందుతున్నారు. గతంలో ఏనుగుల దాడిలో ఒకరు మరణించారు. ఆ సమయంలో పంటలకు కూడా నష్టం జరిగింది. ఏనుగులు ప్రస్తుతం మొక్కజొన్న, వరి, కంది పంటలను ధ్వంసం చేశాయని రైతులు తెలిపారు.

అటవీశాఖ అధికారులు అప్రమత్తమయ్యారు. ప్రత్యేక బృందాలు డ్రోన్ల సాయంతో ఏనుగుల కదలికలను పర్యవేక్షిస్తున్నాయి. సావలీ ఫారెస్ట్ రేంజ్ అధికారి వినోద్ తుర్వే మాట్లాడుతూ, ఏనుగులను చూస్తే దగ్గరకు వెళ్లవద్దని సూచించారు. ఫోటోలు, వీడియోలు తీయవద్దని, వాటిని తరిమే ప్రయత్నం చేయవద్దని చెప్పారు.

రాత్రి సమయంలో ఏనుగులు తిరిగే ప్రాంతాల్లో జనం తిరగవద్దని అధికారులు హెచ్చరించారు. ఏనుగుల కదలికలు కనిపిస్తే వెంటనే అటవీశాఖకు సమాచారం ఇవ్వాలని కోరారు. అధికారులు గ్రామాల్లో ప్రచారం చేస్తున్నారు. ఏనుగులను అటవీ ప్రాంతానికి పంపే వరకు ప్రజలు అప్రమత్తంగా ఉండాలని సూచించారు.