ఏలూరు జిల్లాలో తీవ్ర వడగాలులు — 47 డిగ్రీల వరకు ఉష్ణోగ్రతలు నమోదయ్యే అవకాశం

ఏలూరు జిల్లాలో తీవ్రమైన వడగాలులు వీస్తున్నాయి. ఉదయం 10 గంటలకే 40 డిగ్రీల ఉష్ణోగ్రతలు నమోదయ్యాయి. ఈరోజు మధ్యాహ్నానికి 47 డిగ్రీల వరకు చేరే అవకాశం ఉందని వాతావరణ శాఖ హెచ్చరించింది.

జిల్లా కలెక్టర్ ఉదయం 11 గంటల నుండి సాయంత్రం 4 గంటల వరకు Red Alert ప్రకటించారు. అత్యవసర పరిస్థితి తప్ప బయటకు రావద్దని అధికారులు సూచించారు.

జిల్లాలోని వివిధ ప్రాంతాల్లో నమోదైన ఉష్ణోగ్రతలు: భీమవరం 43 డిగ్రీలు, తనుకు-తాడేపల్లిగూడెం 44 డిగ్రీలు, పోలవరం-జంగారెడ్డిగూడెం-బొట్టాయిగూడెం ప్రాంతాల్లో 45 డిగ్రీల వరకు నమోదయ్యాయి.

మరో నాలుగు రోజుల పాటు ఈ ఉష్ణోగ్రతలు కొనసాగే అవకాశం ఉందని అధికారులు తెలిపారు.

ప్రజల భద్రత కోసం అధికారులు పలు చర్యలు తీసుకున్నారు. bus stands, రైల్వే స్టేషన్లు, ప్రధాన కూడళ్ల వద్ద మంచినీటి సౌకర్యం, శీతలీకరణ షెడ్లు ఏర్పాటు చేశారు. ప్రధాన రహదారులపై green mats వేసి నీడ కల్పించారు.

ఆసుపత్రుల్లో గర్భిణులు, బాలింతలను AC గదులకు మార్చారు. అంగన్వాడీ కేంద్రాలను ఉదయం 11 గంటలకే మూసివేసి పిల్లలను ఇంటికి పంపిస్తున్నారు. వృద్ధులు, మహిళలు, చిన్నారుల విషయంలో ప్రత్యేక జాగ్రత్తలు తీసుకోవాలని వైద్యశాఖను ఆదేశించారు. స్వచ్ఛంద సంస్థలు కూడా చలివేంద్రాలు ఏర్పాటు చేశాయి.