ఏలూరు జిల్లాలో తల్లీ కూతుళ్లు అనుమానాస్పద మృతి; పోలీసుల విచారణ

ఏలూరు జిల్లా ఒంగుటూరు మండలం నల్లమాడు సమీపంలోని ఒక జీడి మామిడి తోటలో తల్లి, కూతురు మృతదేహాలు లభ్యమయ్యాయి. మృతదేహాలు కుళ్లిన స్థితిలో ఉన్నాయి. పోలీసులు సంఘటన స్థలానికి చేరుకొని విచారణ ప్రారంభించారు.

గత నెల 29వ తేదీన తూర్పు గోదావరి జిల్లా దూబచర్లలో బంధువుల పుట్టినరోజు వేడుకకు హాజరుకావడానికి వెంకటలక్ష్మి, ఆమె కుమార్తె వరలక్ష్మి ఏలూరు నుంచి బయలుదేరారు. అదే రోజు రాత్రి 8 గంటలకు వెంకటలక్ష్మి తన సోదరుడు నాగబాబుకు ఫోన్ చేసి దూబచర్ల చేరుకున్నామని చెప్పారు. ఆ తర్వాత వారి ఫోన్ స్విచ్చాఫ్ అయింది. కుటుంబ సభ్యులు ఎంత వెతికినా ఆచూకీ లభించలేదు.

ఇటీవల నల్లమాడు సమీపంలోని జీడి మామిడి తోటలో స్థానికులు రెండు మృతదేహాలను చూసి పోలీసులకు సమాచారం ఇచ్చారు. మృతులను వార్డ్ వెంకటలక్ష్మి, వరలక్ష్మిగా గుర్తించారు. వరలక్ష్మి ఏలూరు మున్సిపల్ కార్పొరేషన్ కార్యాలయంలో ఆఫీస్ సబార్డినేట్గా పనిచేస్తుండగా, దివ్యాంగురాలైన ఆమెకు తల్లి సహాయంగా ఉండేవారు.

ప్రాథమిక విచారణలో మృతదేహాలు 40 మీటర్ల దూరంలో పడి ఉన్నట్లు తేలింది. బంగారు ఆభరణాలు, నగదు కోసం హత్య జరిగిందా అనే కోణంలో పోలీసులు దర్యాప్తు చేస్తున్నారు. వీరిని మరెక్కడైనా హతమార్చి తోటలో పడేశారా, లేక అక్కడే హత్య జరిగిందా అన్న వివరాలు తెలియాల్సి ఉంది. ఏలూరు-దూబచర్ల మార్గంలోని సీసీ కెమెరాలను పరిశీలిస్తున్నారు.