రాజమహేంద్రవరం ఈఎస్ఐసి ఆసుపత్రిలో కార్పొరేట్ స్థాయి సౌకర్యాలు, ఉచిత చికిత్స

రాజమహేంద్రవరంలోని ఈఎస్ఐసి ఆసుపత్రి కార్పొరేట్ ఆసుపత్రులకు దీటుగా అత్యాధునిక సౌకర్యాలతో అందుబాటులో ఉంది. కార్మికులకు, వారి కుటుంబాలకు ఎటువంటి ఖర్చు లేకుండా ఇక్కడ చికిత్స అందుతోంది.

ఈ ఆసుపత్రి 1987లో 50 పడకలతో ప్రారంభమైంది. గత ప్రభుత్వ హయాంలో భవనం శిథిలావస్థకు చేరడంతో దాన్ని కూల్చివేసి, సుమారు రూ.75 కోట్ల వ్యయంతో 100 పడకల సామర్థ్యంతో తిరిగి నిర్మించారు. ప్రస్తుతం ఆరు ఎకరాల విస్తీర్ణంలో, 1.5 లక్షల చదరపు అడుగుల బిల్టప్ ఏరియాలో ఈ భవనం విస్తరించింది.

ఆసుపత్రిలో అత్యాధునిక ఆపరేషన్ థియేటర్లు, స్కానింగ్ యంత్రాలు, ల్యాబ్లు, విశాలమైన వార్డులు ఉన్నాయి. ఎముకలు, గుండె, ఊపిరితిత్తులు, కిడ్నీ, కంటి వైద్య నిపుణులతో పాటు మహిళలు, శిశువులకు ప్రత్యేక వార్డులు ఏర్పాటు చేశారు. రోగితో పాటు వచ్చే సహాయకుడికి కూడా ఉచిత భోజనం అందిస్తున్నారు.

గతంలో ఇక్కడ రోజుకు 150 మంది వరకు ఓపి చికిత్స పొందేవారు. ఇప్పుడు ఈ సంఖ్య 450కి పెరిగింది. తూర్పు గోదావరి జిల్లా, పరిసర ప్రాంతాల నుంచి దాదాపు 1.50 లక్షల మంది కార్మికులు ఈ ఆసుపత్రిపై ఆధారపడుతున్నారు.

చికిత్స పొందుతున్న రోగులు సేవల పట్ల సంతృప్తి వ్యక్తం చేశారు. ఒక రోగి మాట్లాడుతూ, “ఇన్నాళ్లు కీళ్ల నొప్పులతో బాధపడ్డాను. డాక్టర్ బాగా చూస్తున్నారు, ఇంజెక్షన్ ఇచ్చారు. ఫుడ్ కూడా బాగుంది” అన్నారు. మరో రోగి, “ఏ రూపాయి ఖర్చు లేదు. అన్ని రకాల వైద్యం ఉచితంగా చేస్తున్నారు” అని చెప్పారు. రాష్ట్రంలో మరిన్ని ప్రాంతాల్లో ఇలాంటి ఈఎస్ఐసి ఆసుపత్రుల నిర్మాణానికి ప్రభుత్వం ప్రణాళికలు రూపొందించింది.