యూరియా ఎరువు వాడకం: అధిక మోతాదు వల్ల వరి పంటకు నష్టాలు, సరైన పద్ధతులు

వరి పంటలో యూరియా ఎరువును అధికంగా వాడడం వల్ల రైతులు నష్టాలను ఎదుర్కొంటున్నారు. అధిక దిగుబడి ఆశతో చాలా మంది రైతులు అవసరమైన దానికంటే రెండు నుంచి రెండున్నర రెట్లు ఎక్కువ యూరియా వేస్తున్నారు. ఇది నేల, గాలి కలుషితం కావడంతో పాటు పంటకు అనేక హాని కలిగిస్తోంది.

యూరియా వేసిన వెంటనే పైరు పచ్చగా కనిపించడంతో రైతులు దీనిని అధికంగా వాడుతున్నారు. కానీ మోతాదు మించితే మొక్కల్లో పూత, కాత ఆలస్యం అవుతాయి. చీడపీడల బెడద ఎక్కువై పెట్టుబడులు పెరుగుతాయి. అంతేకాకుండా గింజల నాణ్యత తగ్గి తాలు ధాన్యం ఏర్పడే అవకాశం ఉంది.

యూరియాను ఒకేసారి మొత్తం వేయకుండా దశల వారీగా వేయాలని వ్యవసాయ నిపుణులు సూచిస్తున్నారు. నారు నాటే సమయం, పిలక దశ, చిరు పొట్ట దశలలో వేయడం వల్ల మొక్కకు సరిగ్గా ఉపయోగపడుతుంది. యూరియాతో వేపపిండి కలిపి వేస్తే నత్రజని అందుబాటు పెరగడంతో పాటు చీడపీడల నుంచి రక్షణ లభిస్తుంది.

భూమిలో తగినంత తేమ ఉన్నప్పుడు మాత్రమే యూరియా వేయాలి. తేమ లేకపోతే 2-3% యూరియా ద్రావణాన్ని పిచికారీ చేసుకోవాలి. కాంప్లెక్స్ ఎరువులు యూరియాకు ప్రత్యామ్నాయం కాదు. కాబట్టి యూరియాను అవసరమైనంత మాత్రమే వాడడం ద్వారా అధిక వినియోగాన్ని తగ్గించి, నేల ఆరోగ్యాన్ని కాపాడుకోవాలి.