విదేశీ నిధుల దుర్వినియోగంపై ఎఫ్సీఆర్ఏ బిల్లు: ఏ ఒక్క సమాజాన్ని లక్ష్యంగా కాదన్న దేవేంద్ర ఫడ్నవీస్

దేశ వ్యతిరేక కార్యకలాపాలకు విదేశీ నిధులను దుర్వినియోగం చేస్తున్న సంస్థలపై కేంద్ర ప్రభుత్వం కొత్త ఎఫ్సీఆర్ఏ బిల్లును తీసుకువచ్చిందని, ఈ బిల్లు ఏ ఒక్క మత సమాజాన్ని లక్ష్యంగా చేసుకుని రూపొందించలేదని మహారాష్ట్ర ఉప ముఖ్యమంత్రి దేవేంద్ర ఫడ్నవీస్ స్పష్టం చేశారు.

విదేశాల నుంచి విరాళాలు స్వీకరించే సంస్థలన్నీ ఎఫ్సీఆర్ఏ నిబంధనలకు లోబడి ఉండాలని, మంచి పనిచేసే వారికి ఈ బిల్లులో ఎలాంటి ఇబ్బంది ఉండదని ఆయన వివరించారు. విదేశీ నిధుల లెక్కలు సమర్పించే సంస్థల లైసెన్స్లు యథావిధిగా కొనసాగుతాయని హామీ ఇచ్చారు.

ఇటీవల పార్లమెంటులో ప్రవేశపెట్టిన ఎఫ్సీఆర్ఏ సవరణ బిల్లు క్రైస్తవ సంస్థలను మాత్రమే లక్ష్యంగా చేసుకుందంటూ వస్తున్న విమర్శలను ఆయన తోసిపుచ్చారు. విదేశీ విరాళాలు పొందే అన్ని వర్గాల సంస్థలకు ఈ చట్టం వర్తిస్తుందని, ఇది కేవలం ఒక కమ్యూనిటీకి సంబంధించిన అంశం కాదని స్పష్టం చేశారు.

దేశంలో కొన్ని సంస్థలు ఎఫ్సీఆర్ఏ మార్గంలో నిధులు తెచ్చి, దేశ వ్యతిరేక కార్యకలాపాలకు ఉపయోగిస్తున్న నేపథ్యంలో కేంద్రం ఈ బిల్లును తీసుకువచ్చిందని ఫడ్నవీస్ తెలిపారు. బిల్లుపై సూచనలు ఉంటే పార్లమెంటులో చెప్పవచ్చని, ప్రభుత్వం స్వీకరించడానికి సిద్ధంగా ఉందని పేర్కొన్నారు. ఈ బిల్లు త్వరలో పార్లమెంటు ఆమోదం పొందనుంది.