మధిరలో మురుగు నీటి సమస్యతో కుటుంబం నిరసన, తలుపులు వేసుకుని లోపలే

ఖమ్మం జిల్లా మధిరలో మురుగు నీటి సమస్యతో ఓ కుటుంబం నిరసనకు దిగింది. మధిర బస్‌స్టాండ్ సమీపంలో నివసించే పల్లపోతుల ఉపేందర్, తన తల్లితో సహా కుటుంబ సభ్యులు ఇంటి తలుపులు లోపల గడియపెట్టుకుని ఆందోళన వ్యక్తం చేశారు.

వారి ఇంటి ముందు రోడ్డుపై మురుగు నీరు నిలిచిపోయి తీవ్ర అసౌకర్యం కలుగుతోందని, ఎప్పటి నుంచో పరిష్కారం కోసం అధికారులను సంప్రదిస్తున్నామని ఉపేందర్ ఆవేదన వ్యక్తం చేశారు. కాంట్రాక్టర్, స్థానిక కౌన్సిలర్, రాజకీయ నాయకులు తమపై దౌర్జన్యం చేశారని, పోలీసులకు ఫిర్యాదు చేయగా, తమను పోలీస్‌స్టేషన్‌కు తీసుకెళ్లి కొట్టించారని ఆరోపించారు.

ఈ ఘటనపై స్థానిక పోలీసులు, మున్సిపల్ అధికారులు ఎటువంటి స్పందన ఇవ్వలేదు. నిరసన కారణంగా ఆ ప్రాంతంలో ఉద్రిక్తత నెలకొంది.