ధాన్యం కొనుగోలు ఆలస్యంపై రైతు వినూత్న నిరసన — తోపుడు బండిపై 7 కి.మీ నడక

యాదాద్రి జిల్లా ఆలేరు మండలానికి చెందిన రైతు మణిపాల్ రెడ్డి, ధాన్యం కొనుగోలు ఆలస్యంపై వినూత్న నిరసన నమోదు చేశారు. కాళ్ళకు చెప్పులు లేకుండా తోపుడు బండిపై ధాన్యం బస్తాలు వేసుకొని కొలనుపాక నుండి ఆలేరు మార్కెట్ యార్డ్ వరకు 7 కిలోమీటర్లు నడిచారు.

కొలనుపాక ధాన్యం కొనుగోలు కేంద్రంలో ధాన్యం రాసులు పేరుకుపోయాయి. కొనుగోలు పూర్తి కాకపోవడంతో రైతులు వారాల తరబడి వేచి ఉన్నారు. ఒకవైపు వర్షాలకు ధాన్యం తడిచిపోతుందని ఆందోళన వ్యక్తమవుతోంది.

వాతావరణ శాఖ రాబోయే రెండు మూడు రోజుల్లో వర్షాలు పడతాయని హెచ్చరించింది. వానాకాలం సీజన్ రాకముందే ధాన్యం కొనుగోలు పూర్తి చేయాలని రైతులు డిమాండ్ చేస్తున్నారు. కొనుగోలు కేంద్రాల్లో ధాన్యం వెంటనే కొనాలని మణిపాల్ రెడ్డి విజ్ఞప్తి చేశారు.