చింతకాని సొసైటీ దగ్గర మక్క రైతులపై కేసులు నమోదు

ఖమ్మం జిల్లా చింతకాని సొసైటీ వద్ద మక్క రైతులు ఈ నెల 22న నిరసన నిర్వహించారు. 55 రోజులుగా కొనుగోలు కేంద్రాల్లో వారి పంట బస్తాలు తరలించలేదని రైతులు ఆందోళనకు దిగారు. నిరసన అనంతరం సొసైటీ కార్యాలయానికి తాళాలు వేశారు.

ఈ ఘటనపై సొసైటీ సిబ్బంది ఇచ్చిన ఫిర్యాదు ఆధారంగా పోలీసులు ముగ్గురు BRS నాయకులపై కేసు నమోదు చేశారని SI N. వీరేందర్ తెలిపారు. మాజీ MPP పొనుగోటి రత్నాకర్, మండల నాయకుడు జనగాబోయిన కృష్ణయ్య, ఆకుల చంద్రయ్యలపై కేసు పెట్టారు. మొత్తం ఎంతమందిపై కేసు నమోదు చేశారనే వివరాలు పోలీసులు వెల్లడించలేదు.

ప్రైవేట్ లారీలు బస్తాకు ₹80 వసూలు చేస్తున్నాయని, ప్రభుత్వ లారీలు మాత్రమే కేటాయించాలని రైతులు డిమాండ్ చేశారు. వందలమంది రైతులు ఆందోళనలో పాల్గొంటే కేవలం BRS నాయకులపై మాత్రమే కేసు పెట్టడం సరికాదని BRS రైతు సంఘాల నాయకులు అభ్యంతరం వ్యక్తం చేశారు.

కేసులు వెంటనే ఎత్తివేయాలని ఖమ్మం జెడ్పి మాజీ చైర్మన్ లింగాల కమల్‌రాజు డిమాండ్ చేశారు. ఈ విషయంపై రాష్ట్ర ప్రభుత్వం మరియు కాంగ్రెస్ పార్టీ స్పందన తెలియాల్సి ఉంది.