రంగన్నగూడెంలో గోదావరి జలాలకు జలహారతి

రంగన్నగూడెం (కృష్ణా జిల్లా): బాపులపాడు మండలం రంగన్నగూడెం గ్రామంలో గోదావరి జలాలు రాక సందర్భంగా శుక్రవారం జలహారతి కార్యక్రమం నిర్వహించారు. రాష్ట్ర సాగునీటి సంఘాల సమైక్య వినియోగదారుల అధ్యక్షులు ఆళ్ల గోపాలకృష్ణ ఆధ్వర్యంలో రైతులు, మహిళలు పాల్గొన్నారు.

పోలవరం కుడికాలవ ద్వారా నీటిని జూలై 8న మంత్రి నిమ్మల రామానాయుడు విడుదల చేశారు. ఈ నీరు 129 కిలోమీటర్ల దూరం ప్రయాణించి శుక్రవారం ఉదయం రంగన్నగూడెం వద్దకు చేరింది. దీంతో గ్రామస్థులు గోదావరి తల్లికి స్వాగతం పలుకుతూ జలహారతి ఇచ్చారు.

ఇప్పటికే నాట్లు వేసిన రైతులకు ఈ నీరు మొదటి తడిగా ఉపయోగపడుతుందని రైతులు తెలిపారు. కృష్ణా డెల్టా ప్రాంతం రెండో పంటకు సిద్ధం అవుతున్నట్లు చెప్పారు. నీటి విడుదలతో రైతులు సంతోషం వ్యక్తం చేశారు.