ఆదిలాబాద్ శాస్త్రవేత్త రాజశేఖర్ సూచనలు: పంటలకు సరైన ఎరువుల మోతాదు

రసాయన ఎరువుల అధిక వాడకం వల్ల పంటల దిగుబడి తగ్గుతోంది. నేల ఆరోగ్యం కూడా దెబ్బతింటోంది. ఈ సమస్యపై ఆదిలాబాద్ వ్యవసాయ పరిశోధన స్థానం శాస్త్రవేత్త రాజశేఖర్ కీలక సూచనలు చేశారు. సమీకృత ఎరువుల వాడకం ద్వారా దిగుబడి పెంచుకోవచ్చని ఆయన తెలిపారు.

ముందుగా ప్రతి రైతు భూసార పరీక్ష చేయించుకోవాలి. ఈ పరీక్ష ద్వారా నేలకు ఏ పోషకాలు ఎంత అవసరమో తెలుస్తుంది. తద్వారా ఎరువుల మోతాదును ఖచ్చితంగా పాటించవచ్చు. మోతాదుకు మించి రసాయన ఎరువులు వేయడం వల్ల ఖర్చు పెరగడమే కాక, నేల సారాన్ని కోల్పోతుంది.

రసాయన ఎరువులతో పాటు సేంద్రియ ఎరువులను తప్పనిసరిగా వాడాలని రాజశేఖర్ సూచించారు. పశువుల పెంటను ఎకరానికి 1 నుంచి 2 టన్నుల వరకు వాడొచ్చు. వానపాముల ఎరువును ఎకరానికి 1 టన్ను వాడవచ్చు. ఇలా వాడితే నేలలో సూక్ష్మజీవులు అభివృద్ధి చెందుతాయి. నేల సారవంతం పెరుగుతుంది.

నీమ్‌కోటెడ్ యూరియాను వాడటం వల్ల నత్రజని స్లోగా విడుదలై, మోతాదు తగ్గించుకోవచ్చు. అలాగే పంట మార్పిడి చేసినా రసాయన ఎరువుల అవసరం తగ్గుతుంది. ఫాస్ఫరస్, పొటాష్ కరిగించే బ్యాక్టీరియాను విత్తన శుద్ధి లేదా నేలకు అప్లై చేస్తే రసాయన ఎరువుల మోతాదు తగ్గించవచ్చు. ఈ పద్ధతులు పాటిస్తే పెట్టుబడి తగ్గి లాభాలు పెరుగుతాయని శాస్త్రవేత్త వివరించారు.