సన్న బియ్యం ధరలపై చర్యలు: ₹66కే అమ్మాలని ఆదేశం, ఉల్లంఘించిన వ్యాపారులపై కేసులు

సన్న బియ్యం కిలో ₹66కే అమ్మాలని ప్రభుత్వం ఆదేశాలు జారీ చేసినా, కొన్ని ప్రాంతాల్లో అధిక ధరలు వసూలు చేస్తున్నారన్న ఆరోపణలు వస్తున్నాయి. నగరంలోని పలు ప్రాంతాల్లో రైస్ డిపోలు, బియ్యం దుకాణాలపై సివిల్ సప్లై అధికారులు తనిఖీలు నిర్వహించారు. కొన్ని చోట్ల ప్రభుత్వం నిర్ణయించిన ధరలకే అమ్మకాలు జరుగుతున్నాయి.

నిబంధనలు ఉల్లంఘించిన వ్యాపారులపై కేసులు నమోదు చేస్తున్నారు. ట్రేడ్ లైసెన్స్ లేని దుకాణాలపై కూడా చర్యలు తీసుకుంటున్నారు. కొందరు వ్యాపారులు రేషన్ బియ్యాన్ని పాలిష్ చేసి, బ్రాండెడ్ రైస్ పేరుతో ఎక్కువ ధరకు అమ్ముతున్నారని ఆరోపణలు ఉన్నాయి. ఇష్టానుసారంగా ధరలు నిర్ణయిస్తున్నారని కూడా ఆరోపణలు వినిపిస్తున్నాయి.

హోల్‌సేల్ రైస్ డిపోల నిర్వాహకులు మాత్రం ప్రభుత్వ ధరలే పాటిస్తున్నామని చెప్తున్నారు. ధరల నియంత్రణ తర్వాత రకాలను తగ్గించి మూడు రకాలే అమ్ముతున్నామని తెలిపారు. బేసిక్ క్వాలిటీ కిలో ₹66, సూపర్ ఫైన్ ₹74, ఎక్సలెంట్ క్వాలిటీ ₹79 ధరలను కొనసాగిస్తున్నామన్నారు. HMT, JSR, లష్కరీ తదితర రకాలు ఉన్నాయని వారు వివరించారు.

హోటల్ నిర్వాహకులు రోజూ బియ్యం కొనుగోలు చేస్తామని చెప్పారు. గతంలో కిలో ₹90 నుంచి ₹100 వరకు ఇచ్చిన సందర్భాలున్నాయని, ఇప్పుడు ప్రభుత్వ ధరే వస్తోందని తెలిపారు. నెలకోసారి సుమారు నాలుగు బ్యాగులు కొనుగోలు చేస్తున్నట్టు వారు చెప్పారు.

ప్రభుత్వ ఆదేశాలు కాగితాలకే పరిమితం కాకుండా క్షేత్రస్థాయిలో అమలు కావాలని వినియోగదారులు కోరుతున్నారు. దాడులు, తనిఖీలతో సరిపెట్టకుండా పర్యవేక్షణ పెంచాలని అంటున్నారు. అన్ని ప్రాంతాల్లోనూ నిర్ణయించిన ధరకే బియ్యం అమ్మాలని డిమాండ్ చేస్తున్నారు.