ముమ్మిడివరం: ఎండు కొబ్బరి గోదాములో అగ్నిప్రమాదం, భారీ నష్టం

డాక్టర్ బి.ఆర్. అంబేద్కర్ కోనసీమ జిల్లా ముమ్మిడివరం మండలం కొత్తలంక గ్రామంలో ఎండు కొబ్బరి గోదాములో అగ్నిప్రమాదం జరిగింది. తెల్లవారుఝామున 3 గంటల సమయంలో మంటలు చెలరేగాయి. సమాచారం అందుకున్న అగ్నిమాపక సిబ్బంది ఘటనా స్థలానికి చేరుకుని మంటలను ఆర్పివేశారు.

గోదాములో నిల్వ ఉంచిన దాదాపు 2,50,000 కొబ్బరికాయలు పూర్తిగా దగ్ధమయ్యాయి. యజమాని పెద్దిరెడ్డి సత్యనారాయణ తెలిపిన వివరాల ప్రకారం, షార్ట్ సర్క్యూట్ వల్లే ఈ ప్రమాదం జరిగింది. గత 20 ఏళ్లుగా కొబ్బరికాయ వ్యాపారం చేస్తున్నామని, ఎగుమతి కోసం సిద్ధం చేసిన ఈ నిల్వ పూర్తిగా బూడిదైపోయిందని, భారీ నష్టం వాటిల్లిందని ఆయన ఆవేదన వ్యక్తం చేశారు.

ఘటనపై పోలీసులు కేసు నమోదు చేశారు. ఇప్పటివరకు ప్రాణనష్టం జరిగినట్టు సమాచారం లేదు.