బంజారా హిల్స్‌లో భవనం సెల్లార్లో అగ్నిప్రమాదం; 11 మందిని రక్షించిన అగ్నిమాపక సిబ్బంది

హైదరాబాద్ బంజారా హిల్స్ రోడ్ నంబర్ 10 లోని ఓ భవనం సెల్లార్లో అగ్నిప్రమాదం జరిగింది. మంటలు చెలరేగడంతో నాలుగు ఫైర్ ఇంజన్లతో అగ్నిమాపక సిబ్బంది మంటలను అదుపుచేశారు.

పొగ ఎక్కువగా రావడంతో భవనంలో చిక్కుకున్న 11 మందిని రక్షించారు. ఈ ఘటనలో ఎవరికీ గాయాలు లేదా ప్రాణ నష్టం జరగలేదని ఫైర్ అధికారులు తెలిపారు.

సెల్లార్లో వైన్ షాప్ గోదాం నిర్వహిస్తున్నట్లు అధికారులు గుర్తించారు. అక్కడ సుమారు 100 లిక్కర్ బాటిళ్లు, ప్యాకింగ్ కార్టూన్లు, స్క్రాప్ నిల్వ ఉన్నాయి. అలాగే, BRK న్యూస్ ఛానెల్‌కు సంబంధించిన కెమెరాలు, 4జీ కిట్లు, నాలుగు వాహనాలు, రెండు ఎలక్ట్రిక్ స్కూటర్లు కూడా అగ్నికి దగ్ధమయ్యాయి.

జిల్లా ఫైర్ అధికారి వెంకన్న మాట్లాడుతూ, మంటలు వ్యాపించకుండా 50 మంది సిబ్బంది, ఆరు ఫైర్ వాహనాలు తక్షణం రంగంలోకి దిగాయన్నారు. స్మోక్ ఎగ్జాస్టర్లు వాడి లోపల మంటలను పూర్తిగా అదుపు చేశామని, నష్టం అంచనా ప్రస్తుతం చూస్తున్నామని చెప్పారు. ప్రమాద కారణాలపై దర్యాప్తు కొనసాగుతోంది.