గుంటూరు టీచర్స్ కాలనీలో అగ్ని ప్రమాదం — పైపులకు నిప్పంటుకుంది

గుంటూరు ఇన్నర్ రింగ్ రోడ్ వద్ద ఉన్న టీచర్స్ కాలనీ (ప్రకాష్ నగర్)లో ఈరోజు ఉదయం అగ్ని ప్రమాదం జరిగింది. భూగర్భ డ్రైనేజీ పనుల కోసం తీసుకొచ్చిన వేలాది పైపులు అక్కడ ఖాళీ స్థలంలో నిల్వ ఉన్నాయి. ఆ పైపులకు నిప్పంటుకుని భారీగా తగలబడుతున్నాయి.

నిర్మాణ సంస్థ Shapoorji Pallonji భూగర్భ డ్రైనేజీ పనుల కోసం ఈ పైపులు తీసుకొచ్చింది. పనులు మధ్యలోనే ఆగిపోవడంతో 10 సంవత్సరాలుగా పైపులు అక్కడే ఉండిపోయాయి. ఆ పనులకు సంబంధించి కోర్టు కేసులు కూడా నడుస్తున్నాయని తెలుస్తోంది.

చుట్టూ చెత్త పేరుకుపోవడం, ఎండకు ఆకులు ఎండిపోవడం వల్ల మంటల తీవ్రత ఎక్కువైంది. నల్లని పొగ భారీగా ఎగిరింది. చుట్టుపక్కల నివాసితులు భయాందోళనకు గురయ్యారు.

స్థానికులు అగ్నిమాపక శాఖ అధికారులకు, పోలీసులకు వెంటనే సమాచారం ఇచ్చారు. Fire engines స్థలానికి చేరుకుని మంటలు ఆపే ప్రయత్నం చేస్తున్నాయి.

పైపులు సరిగ్గా నిర్వహించకపోవడమే ఈ ప్రమాదానికి కారణమని స్థానికులు ఆరోపిస్తున్నారు. Shapoorji Pallonji సంస్థ నిర్లక్ష్యంగా వ్యవహరించిందని, నగరపాలక సంస్థ అధికారులు కూడా పట్టించుకోలేదని స్థానికులు చెప్తున్నారు. ఈ ఆరోపణలపై సంస్థ, అధికారుల స్పందన తెలియాల్సి ఉంది.