పంజాగుట్ట NIMS హాస్పిటల్‌లో అగ్నిమాపక శాఖ మాక్ డ్రిల్ నిర్వహణ

హైదరాబాద్‌లోని పంజాగుట్ట NIMS హాస్పిటల్‌లో అగ్నిమాపక శాఖ ఆధ్వర్యంలో అగ్ని ప్రమాదాల నివారణపై అవగాహన కార్యక్రమం మరియు మాక్ డ్రిల్ నిర్వహించారు. జిల్లా అగ్నిమాపక అధికారి వెంకన్న పర్యవేక్షణలో ఈ కార్యక్రమం జరిగింది.

ప్రమాదాలు జరిగినప్పుడు రోగులను మరియు సిబ్బందిని సురక్షితంగా తరళించే విధానంపై ఫైర్ సిబ్బంది లైవ్ డెమో ఇచ్చారు. నడవలేని స్థితిలో ఉన్న రోగులను మరియు ICU లో ఉన్నవారిని తక్కువ సమయంలో సురక్షిత ప్రాంతాలకు తరలించే పద్ధతులను ప్రదర్శించారు.

ఆధునిక సాంకేతికత మరియు నిచ్చనల సహాయంతో పై అంతస్తుల నుంచి వ్యక్తులను కిందకు దించే పద్ధతులను చేసి చూపించారు. భవనాల్లో చిక్కుకుపోయిన వారిని రక్షించే మాక్ రెస్క్యూ ఆపరేషన్లు కూడా నిర్వహించారు.

హాస్పిటల్ సిబ్బంది, డాక్టర్లు మరియు భద్రతా సిబ్బందికి అగ్ని నిరోధక పరికరాలను ఎలా ఉపయోగించాలో నేర్పించారు. అగ్ని ఏర్పడటానికి అవసరమైన అంశాలు ఏమిటో, వాటిలో దేన్ని తొలగించడం ద్వారా మంటలను అదుపు చేయవచ్చో సిద్ధాంతపరంగా వివరించి ఆచరణాత్మకంగా చేసి చూపించారు.

ప్రతి వారం హైదరాబాద్ పరిధిలో హాస్పిటళ్లు, షాపింగ్ మాల్స్ మరియు పెద్ద భవనాలలో ఇలాంటి మాక్ డ్రిల్స్ నిర్వహిస్తున్నామని అధికారులు తెలిపారు. అగ్ని ప్రమాదం జరిగిన తొలి కొన్ని నిమిషాలు అత్యంత కీలకమని, ప్రాథమిక దశలోనే మంటలను అదుపు చేయగలిగితే పెద్ద నష్టాన్ని నివారించవచ్చని ఫైర్ అధికారులు స్పష్టం చేశారు.

ఈ మాక్ డ్రిల్ హాస్పిటల్ సిబ్బందిలో ధైర్యాన్ని, అత్యవసర పరిస్థితులను ఎదుర్కొనే సామర్థ్యాన్ని పెంచిందని జిల్లా అగ్నిమాపక అధికారి వెంకన్న పేర్కొన్నారు.