పంజాగుట్ట NIMS హాస్పిటల్‌లో అగ్నిమాపక శాఖ మాక్ డ్రిల్

పంజాగుట్ట లోని NIMS హాస్పిటల్ లో అగ్నిమాపక శాఖ ఆధ్వర్యంలో మాక్ డ్రిల్ నిర్వహించారు. అగ్ని ప్రమాదాలు జరిగినప్పుడు అత్యవసర పరిస్థితులను ఎలా ఎదుర్కోవాలో హాస్పిటల్ సిబ్బందికి అవగాహన కల్పించారు.

ఈ కార్యక్రమంలో భాగంగా హాస్పిటల్ లోని వార్డుల నుంచి రోగులను సురక్షితంగా బయటకు తరలించే ఎవాక్యుయేషన్ డెమోని ప్రదర్శించారు. నడవలేని స్థితిలో ఉన్న రోగులను, ఐసియు లోని వారిని తక్కువ సమయంలో సురక్షిత ప్రాంతాలకు తరలించే విధానాన్ని చూపించారు. భవనాల్లో చిక్కుకుపోయిన వారిని రక్షించేందుకు సాంకేతిక పరికరాల సహాయంతో మాక్ రెస్క్యూ ఆపరేషన్లు కూడా నిర్వహించారు.

అగ్నిమాపక సిబ్బంది, మంటలు వ్యాపించకుండా ప్రాథమిక దశలోనే అదుపు చేయడానికి ఫైర్ ఎక్స్టింగ్విషర్లు ఎలా ఉపయోగించాలో, ఫైర్ ఫైటింగ్ టెక్నిక్స్ ను సైతం వివరించారు. అగ్ని రకాలు, వాటి నియంత్రణ పద్ధతులు, ఆక్సిజన్ సరఫరాను నిలిపివేయడం వంటి సైద్ధాంతిక అంశాలను కూడా బోధించారు.

జిల్లా అగ్నిమాపక అధికారి వెంకన్న మాట్లాడుతూ, ప్రతి ఒక్కరికి ఫైర్ సేఫ్టీ, విపత్కర పరిస్థితుల్లో స్పందనపై అవగాహన ఉండాలన్నారు. ఈ మాక్ డ్రిల్ హాస్పిటల్ సిబ్బంది ధైర్యాన్ని, అత్యవసర పరిస్థితులను ఎదుర్కొనే నమ్మకాన్ని పెంచిందని చెప్పారు. ఇలాంటి మాక్ డ్రిల్ లను హైదరాబాద్ పరిధిలో హాస్పిటల్స్, షాపింగ్ మాల్స్, పెద్ద భవనాల్లో వారానికోసారి నిర్వహిస్తున్నట్లు ఆయన తెలిపారు.