IPL ఫైనల్ ఓటమి తర్వాత గుజరాత్ టైటాన్స్ బస్సులో మంటలు; ఆటగాళ్లంతా సురక్షితం

IPL 2026 ఫైనల్ లో ఓటమి అనంతరం గుజరాత్ టైటాన్స్ (GT) జట్టు ప్రయాణించిన బస్సులో అగ్ని ప్రమాదం సంభవించింది. అహ్మదాబాద్ లోని నరేంద్ర మోడీ స్టేడియం నుంచి హోటల్ కు తిరిగి వస్తుండగా ఈ ప్రమాదం జరిగింది. షార్ట్ సర్క్యూట్ కారణంగా మంటలు చిలరేగాయి. అప్రమత్తమైన డ్రైవర్ వెంటనే బస్సు ఆపి ఆటగాళ్లను, సిబ్బందిని కిందికి దించారు. దీంతో పెద్ద ప్రాణ నష్టం తప్పింది.

ఈ ఫైనల్ మ్యాచ్ లో రాయల్ ఛాలెంజర్స్ బెంగళూరు (RCB) గుజరాత్ టైటాన్స్ పై 5 వికెట్ల తేడాతో విజయం సాధించింది. ఓటమి నేపథ్యంలో జట్టు నిరాశలో ఉంది. మ్యాచ్ అనంతరం ప్రెజెంటేషన్ ముగించుకుని బస్సులో బయలుదేరిన కొద్దిసేపటికే డ్యాష్‌బోర్డ్ నుంచి పొగ రావడం ప్రారంభమైంది. ఆ వెంటనే మంటలు విజృంభించాయి. సమాచారం అందిన వెంటనే పోలీసులు సంఘటన స్థలానికి చేరుకుని సహాయక చర్యలు చేపట్టారు.

ఆటగాళ్ళు దాదాపు గంటపాటు రోడ్డు మీదే ఉండిపోయారు. ఎలాంటి హాని జరగకపోవడంతో యాజమాన్యం, అభిమానులు ఊపిరి పీల్చుకున్నారు. ప్రాథమిక దర్యాప్తులో షార్ట్ సర్క్యూట్ వల్లే ప్రమాదం జరిగినట్లు పోలీసులు నిర్ధారించారు.

గుజరాత్ టైటాన్స్ ఈ సీజన్ లో కఠిన ప్రయాణ షెడ్యూల్ ను ఎదుర్కొంది. ఫైనల్ కు ముందు ముల్లాన్‌పూర్ లో ప్రతికూల వాతావరణం కారణంగా విమానం ఆలస్యం అయ్యింది. దీంతో జట్టు శనివారం సాయంత్రం ఆలస్యంగా అహ్మదాబాద్ చేరుకుంది. ఈ అంశంపై స్పందించిన GT క్రికెట్ డైరెక్టర్ విక్రమ్ సోలంకి, ప్రయాణ బడలిక వల్లే ఓడిపోయామని చెప్పడం ఇష్టం లేదని, RCB విజయాన్ని తక్కువ చేయడం మా పద్ధతి కాదని స్పష్టం చేశారు. తాము 155 పరుగులు చేసినా బౌలర్లు గట్టిగా పోరాడారని, ప్రత్యర్ధి జట్టు అద్భుతంగా ఆడిందని అంగీకరించాలని ఆయన వివరించారు.

ప్రస్తుతం బస్సు ప్రమాదం గురించి పూర్తి సాంకేతిక నివేదిక కోసం ఎదురుచూస్తున్నారు. ఈ ఘటనతో GT జట్టుకు చేదు అనుభవం ఎదురైనా ఆటగాళ్ళంతా క్షేమంగా ఉండటం ఊరట కలిగించింది.